Bishaaro Cusmaan: Waxaan biyaha dhabarkeenna uga keennaa meel noo jirta saddex saac oo socod ahXaaladahan biyo la`aaneed ee ka taagan deegaannada qaar hoostaga magaalada Baydhabo ee gobalka bay ayaa ka danbeyay kadib markii ay gureen warihii dadka deegannadu ay biyuhu ka dhaasan jireen iyo ceelashii oo qaar biyo yareeyay.
Deegaannada biyo la`aanta daran ay ka jirto ayaa waxaa ka mid ah Ray-dabaale, Makay ,Buulo-bashiir iyo kuwo kale oo dhamaantooda hoos yimaadda Magaalada Baydhabo,tuulooyinkaas ayaa ah kuwo magaalada aad uga fog.
Xuseen Aadan Ibraahin waa guddoomiyaha deegan lagu magacaabo Gooyaal oo magaalada Baydhabo dhanka bari kaga beegan 8Km, wuxuu ii sheegay mar aan deegaankaasi kula kulmay in dhibaatada ugu daran ee ay dareemayaan ay tahay dhanka biyaha kadib markii muddo ku dhow seddax sano wax biyo ah aan laga helin ceelashii deeganadaasi. “Tuulooyinka, Xaydhabala, Bulo Elay, Murshubow, Bulo Bashir, Ela wardoy weeye meelaha ugu daran hadda” ayuu yiri guddoomiyuhu
Bishaaro Cusmaan waxaa ay ka mid ah tahay dadka ku dhaqan deegaanka Gooyaal mar ay raadiyo Ergo uga warrameysay baxadda biyo la`aanadeed ee deegaankooda iyo tuulooyinka kale ka taagan ayaa waxay sheegtay in biyaha hadda ay ka raadiyaan ceelal ka fog islamarkaana ay u soconayaanna masaafo dhan saddex sacadood taasina dhibaato ku tilmaantay maadama dhabarkooda ay ku keenaan biyaha.
Muddadii aan deegannadaas cabashada biyo la`aan ka taagan kasoo yeertey ayaa kala kulmay gabdho da`dooda ka yer tahay 13 sano oo dhabarka ku sidaan caagado ay biyo ku jiraan waxayna ii sheegeen in inta u dhaxeysa deegaankooda iyo meesha biyaha ay ka keeneen u soo socdaan shan sacadood.
Sidoo kale Intii aan deegaanka ku sugnaa waxaan soo arkey qaar ka mid ah warihii dadka ay biyo markii hore ka dhaansan jireen oo hadda ciid dabooshey, islamarkaana ay rabaan iney mar kale waro ay biyo ka cabaan sameystaan maadama abaarihii waddanka soo maray saameyn ku yeesheen gaar ahaanka abaartii sanadkii 2011-dii ku dhifatey deegaannada Soomaaliya.
Xuseen Aadan waxaa uu dalbanayaa in cid kasta oo wax u awoodda ay dadka deegannadaas ku dhaqan lasoo gaaraan booyado biya ah, sidoo kalena codsadey in deegannada looga qodo baraago ay biyo ku keeydsadaan.
Si kastaba ha ahaatee dadkan biyo la`aanta soo wajahdey ayaa waxaa ay isugu jiraan xoola-dhaqato, beeraley iyo dad kale oo barakac ahaan u jooga deegaannadaasi.
Muxidiin Xusni/MH/MRS
