Wasiirka arrimaha gudaha ee maamulka Ximan iyo Xeeb Cumar Maxamed Diiriye ayaa raadiyo Ergo u sheegay in tuulooyin hoos yimaadda degmadaas ka socoto xaalufin ballaaran oo lagu hayo dhirka deegaanka ka baxdo oo dhuxul laga gubayo. Cumar Maxamed Diiriye ayaa xusay in deegaanada Xiin Jilab, Biyo Gaduud iyo Cado-Kibir oo galbeedka iyo barriga degmada Cadaado ee gobolka Galguduud ay ka socoto xaalufinta ugu badan ee dhirta ee dhuxul laga gubayo.
Dadka dhuxusha gubaya ayaa u badan kooxo dhallinyaro reer guuraa ah oo shaqo la’aan haysto, kuwaas oo doonaya inay deegaanno kale iyo dibadda u suuq-geeyaan dhuxusha si ay nolol maalmoodkooda uga helaan. Wasiirka arrimaha gudaha ee maamulka ee Ximan iyo Xeeb Cumar Diiriye ayaa sheegay dhalinyaradaas xariir la leeyihiin dad ganacsato ah oo kasoo horjeeda nolosha deegaanka kuwaasoo lacago ku siiya dhallinyarada inay dhirta dhuxul ka gubaan.
Dadka ugu badan ee ku nool gobolada Galgaduud iyo Mudug waa xoolo dhaqato, wasiirka arrimaha gudaha ee Ximan iyo Xeeb na wuxuu sheegay in xoolaha iyo dadka deegaankaba ay ku tiirsan yihiin dhirta deegaanka ka baxdo. Cumar Maxamed Diiriye wuxuu tilmaamay in dhirta oo la dhuxuleeyo ay halis ku tahay nolosha iyo mustaqbalka gobolada dhexe oo ah dhul aysan webiyo laheyn.
Weriyaha raadiyow Ergo ee degmada Cadaado wuxuu soo sheegayaa in dhuxulaynta dhirta oo labaatankii sano ee lasoo dhaafay ka socotay gobolka Galguduud ay hoos u dhigtay daaqa iyo roobka xoolahu ka heli karaan deegaanka, dhul kaymo ah oo dhirta iyo daaqsinka ku caan ahaa ayaa dhirtii oo dhan laga gubay oo saxaro banaan isu badalay.
Axmed Sheekh Xasan Jagejage oo badbaadada dhirta iyo deegaanka u olo-oleeya ah ayaa ka digay khatar noloshada dadka, deegaanka iyo xoolaha ba kusoo wajan haddii aan si deg deg ah loo meel-marin sharciyo adag iyo ciqaabo la dul-dhigo dadka ku lugta leh xaalufinta deegaanka.
Axmed Sheekh Xasan wuxuu intaa ku daray in qorshe weliba oo la doonayo in dhirta iyo deegaanka lagu bad-baadiyo muhiimad gaar ah laga siiyo shaqo u abuurista dhalinyarada iyo dadka kale oo laga yaabo in baahi shaqo la’aan ay u geysay inay dhuxusha ka ganacsadaan.
Maamulka Ximan iyo Xeeb ayaa horey xukumo xabsi iyo ganaax isugu jira ku riday dad ku eedeysanaa inay dhirta deegaanka dhuxul ka gubeen. Bishii November ee sanadkii hore ciidamada ammaanka ee maamulkaas ayaa xiray dad ka badan 20-tan qof oo qaarkood la soo qabtay iyaga oo ku mashquulsan dhir jarid iyo gubid. Dadkaas ayaa lagu xukumay afar ilaa lix bilood oo xabsi ah iyo lacag ganaax.
Wasiirka arrimaha gudaha ee Ximan iyo Xeeb Cumar Maxamed Diiriye wuxuu sheegay inay hoos u dhaceen jaridda iyo dhuxul ka gubida dhirta deegaanka wixii ka dambeeyay xukunkaas. Cumar Maxamed Diiriye wuxuu raadiyow Ergo u sheegay in maamulku qorshaynayo mashruuc dhir abuurid ah oo laga hirgeliyo deegaanka.
M.Diirshe/MRoble
