Midowga Yurub ayaa ku taageeraya horuumarinta waxbarashada xeryaha qaxootiga ee Dhadhaab lacag dhan 3 milyan iyo bar yuuro. Mashruucan cusub oo socon doono saddex sano ayaa lagu kordhin doonaa fasallada dugsiyada wax lagu barto ee xerooyinka, iyadoo macallimiinta tababarro aqoon kororsi ah la siinayo.
Maamulaha mashruuca waxbarashada ee Soomaaliya u qaabilsan Midowga Yurub Maxamed Mahad Sabuul ayaa raadiyaha Ergo u sheegay in mashruucan oo la bilaabay horraantii sanadkan uu maalgelin doono dhismaha afartan iyo lix fasal oo lagu kordhiyo dugsiyada ku yaal xerooyinka iyo tababarka 240 ka mid ah macallimiinta wax ka dhiga dugsiyadaas.
Maxamed Mahad Sabuul wuxuu intaa ku daran in labo boqol iyo labaatan kun oo caruur iyo dhallinyaro gaartay da’da waxbarashada ah oo ku nool xeryaha Dhadhaab aysan wada helin fursado waxbarasho. Soddon boqolkiiba oo ka mid ah da’daas gaartay waxbarashada oo u dhiganta lixdan kun oo qof ayaa waxbarta. Hablaha ku nool xerooyinka ay dugsiyada waxbarashada aadana waxay tiradoodu ka hooseysaa labaatan boqolkiiba.
Maamulaha mashruuca waxbarashada ee Soomaaliya u qaabilsan Midowga Yurub wuxuu tiro yarida dadka dugsiyada taga u sababaynayaa dugsiyada xerooyinka ku yaal oo awoodin in arday badan qaataan, haysana agab waxbarasho oo ku filan iyo macalimiinta oo ay aqoontoodu hooseyso.
Xerooyinka qaxootiga Dhadhaab ee gobolka Waqooyi-Barri Kenya oo nus malyuun Soomaali ah ay ku nool yihiin waxaa ku yaal 30 dugsi oo ay taageerto hay’adda qaxootiga u qaabilsan Qaramada Midoobay. lix ka mid ah ayaa dugsiyo sare ah, sidaad sarteed arday badan oo dhameysay dugsiyada dhexe ayaan helin fursad ay waxbarashada dugsiyada sare ay ku siiwadaan.
Maxamed Mahad Sabuul wuxuu ku hanweyn yahay in mashruucan cusub ee hormarinta tayada waxbarashada xerooyinka uu dheerrigelin doono in kumanaan carruur iyo dhallinyaro ah oo waxbarasho la’aan haysto helaan fursado waxbarasho.
Mashruucan oo wuxuu sidoo kale dugsiyada xerooyinka Dhadhaab ugu deeqi doonaa shaybaarrada dugsiyada sare loo isticmaalo, buugaag, qalimo iyo agabyo kale. Mashruuca oo ay fulinayso hay’adda Badbaada Caruurta wuxuu sidoo kale tababarka cilmiga tennoolajiyada iyo kumbiyuutarada u fidin doonaa labo kun oo dhallinyaro ah, taas oo qeyb ka ah dadaallada xirfad u abuurista dhallinyarada qaxootiga ah. Gabdho iyo wiilal kale ayaa iyana baran doono xirfado kale oo ay ku shaqeystaan.
Maamulaha mashruuca waxbarashada ee Soomaaliya u qaabilsan Midowga Yurub Maxamed Mahad Sabuul wuxuu kale oo uu raadiyaha Ergo u sheegay in mashruucu fulin doono deeqo waxbarasho jaamacadeed oo 10 ardayda dugsiga sare dhameysay ah u oggolaan doona inay iska diiwaan geliyaan jaamacadaha Kenya, Soomaaliya iyo dalalka kale ee gobolka.
Midowga Yurub waa deeq-bixiyaha lacagta ugu badan ku bixiya hormarinta Soomaaliya. Shan boqol oo milyan oo yuuro ayay Midowga Yurub ku bixiyeen houurmarinta waxbarashada, beeraha iyo xannaanada xoolaha iyo weliba hagaajinta amniga iyo adeegyada hay’adda dowliga ah ee Soomaaliya shantii sano ee la soo dhaafay sida uu sheegay Maxamed Mahad Sabuul.
Muhyadin Ahmed Roble
