Xilli lagu guda jiro bisha barakaysan ee Ramadaan ayaa dadka naafada ah ee ku nool dagmada Cadaado ee gobolka Galgaduud waxa ay ka cabanayaan xaalad nolol xumo oo soo foodsaartay.
Dadkan oo isugu jira indhoolayaal, Dhagoolayaal iyo cuuryaamiin rag iyo dumar ka kooban ayaa Raadiyaha Ergo u sheegay inaysan jirin cid ay ku tiirsanyihiin oo nolol maalmeedkooda ka caawisa islamarkaana bishan Ramadan aysan haysan cunno ay ku afuraan.
Aadan Axmed Cusmaan oo ah Oday 70-jir ah islamarkaana cuuryaan u noday cudur ku dhacay isagoo 6-jir ah, islamarkaana leh Carruur yar yar oo 14-sano u waynyahay ayaa Raadiyaha Ergo u sheegay in xaaladiisa nololeed aad u liidato, “waxaan ahay waad u jeedaa, 10 carruur ah ayaan haystaa, waxaan ku curyamay cudur aan hadda umalaynayo inuu yahay dabayl, cid iima shaqayso annigana ma shaqaysan karro, waxanan codsanayaa in la iga caawiyo dhinaca nolosha, qof naafo ahna waa la garan karaa.
Caddi Xaashi Sahal Gabalaax oo cataabaya ayaa Ergo u sheegay” Waxaan ka ahay naafo labada lugood iyo gacan, jiro ayaa I heshay toban sano ka hor, cid aan ku tiirsanahay ma jirto, waxaa I haysa gaajo, nafaqa darrada iga muuqata ayaanad ka garanaysaa gaajada I haysaa “
Cismaan Faarax Cabdi oo u hadlaya isaguna guddi ay leeyihiin naafadda Cadaado ayaa Radio Ergo u sheegay, in dadka naafada ah ee halkaan jooga u badan yihiin dad waaweyn, dhibaato ballaaran ayey ku sugan yihiin, xoolo ma leh maamul caawiya ma lahan.
Luul Diiriye waa 35 jir, waxa ay ka mid tahay dadka naafada ah ee ku nool magaalada Cadaado waxaana ay haystaa carruur qaarkood aad u da’yaryihiin, annigoo yar ayaan lugaha belay oo aan curyaan ka ahay, aabohoodna waa uu ka maqanyahay, waxaana ay sheegtay in xaaladooda nololeed ay tahay mid liidata maadaama ay ku adkaato inay digsi dabka saartaan marka ay isku soo hoydaan.
Mar aan wax ka weydiinnay Cumar Maxamed Diiriye oo ah wasiirka arrimaha guddaha ee Ximan iyo Xeeb sida ay uga warqabaan dadkan naafada ah ee ku sugan cadaado ayaa sheegay isagu inay dadkaan baahidooda ka war qabaan wuxuuna yiri “ Bishii Juuna ay 50 ka mid ah gaarsiiyeen xoogaa rashin ah oo isug jira bariisk, digir, iyo saliid, oo qofkiiba la siiyey 25 kiilo, awoodoodo yarse aysan u awoodin inay gaarsiiyaan gargaar joogto ah”
Dadkan naafada ah oo tiradoodu dhan tahay ilaa 150 qof ayaa badankood ku naafoobay cudurro haleelay ayaa ah kuwo aad ugu nugul duruufaha dhinaca nolosha ah ee soo wajaha, iyadoo aysan jirin cid xaaladooda ka warqabta, waxaana dhawr mar oo hore sidan oo kale ka oo baxday cabasho tani la mid ah oo ay ku doonayaan in laga gargaaro nolosha
Diirshe/MH
