Laba beelood oo aanaysi qabiil oo salka ku haya muran dhuleed oo dilal ku dhexmarayeen degmada Jowhar ee gobolka Shabeellaha dhexe ayaa gaaray heshiis nabadeed.
Aanooyinka oo socday labadii sano ee la soo dhaafay ayaa waxaa lagu dilay 15 ruux, iyadoo murankuna ahaa dhul ku yaal duleedka degmada Jawhar. Nabadoon Axmed Xasan Cali Suubiye oo ka mid ah guddiga loo saaray dhex dhexaadinta labadda dhinaca ayaa Ergo uga warramay qodobbada lagu heshiiyey.
Waxaa furmay wadahadal, markaan aragnay dhibaatadu waxay salka ku hayso oo ah saddex waxyaalood oo kala ahaa, dhimasho, dhaqaale burburay iyo dhul la isku haystay, labada qodob ee hore si nadiif ah ayey uga heshiiyeen isuguna cafiyeen qodobkii ugu cuslaa oo dhibtu ka bilaamatay ee ah dhulka la isku haysto. Markii ay soo dhameeyeeen guddi loo xilsaaray iney ka warkeenaan muranka dhulka oo isagu ahaa midka ugu dhibka badnaa, waxaa uu soo gudbiyay guddigii go`aankoodii oo labada beelba ay ku qanceen, kaasoo ay ku caddeeyeen go`aankooda in labada beel middood ay leedahay dhulkaas laysku haystay, sidaasn ayayna murankii dhulka ku soo dhamaaday.
Maxamed Siciid Axmed oo isaguna ka mid ah beel ka mid ah kuwii colaaddu u dhaxaysay ayaa Ergo u sheegay “ anniga 77 jir ayaan ahay, waxanan si niyadsan u qaadannay anniga iyo beeshayduba wixii nabad ah ee guddiga dhex dhexaadintu soo gudbiyeen waanan ku ducaysanay”.
Maxamed Siciid ayaa sidoo kale ammaanay doorkii guddigi dhex dhexaadinta ee isku hawlay deminta colaadda iyo dhiiga daadanayay.
Gudoomiyaha gobolka Shabelaha Dhexe Cabdi Jinow Calasow ayaa isaguna raadiyo ayaa isaguna yiri “Waxaan ku qanacsanahay sida wax la isugu quuray, sida wax la isugu daayey, laguna heshiiyey” iyaguna ka maamul ahaan ay taageerayaan wixii ka soo baxay heshiiskaas”.
Dadka ku nool Jawhar oo ah beeraley iyo xoolo dhaqato ayaa heshiiskii kadib waddooyinka degmada ku soo bandhigay iyagoo labadii qaloba wada jirto ciyaar dhaqameedyo, iyadoona la qalay sumal iyo sabeen oo dhaqan ahaan ay dadka reer Jawhar markii ay nabdaan ama xaajo gaaraan ay qalaan tanoo ka turjumayso siday daacad ugu yihiin heshiiskay gaareen.
Maryan/MH
