Labo diyaaradood oo ay Qaramada Midoobay leedahay iyo mid rakaab oo gaar loo leeyahay ayaa xalay Muqdisho keenay kontan iyo afar qof oo ku dhaawacmay dagaaladii saddexda maalmood socday ee Kismaayo ka dhacay toddobaadkii hore. Tiro gawaarida gargaarka deg deg ah ayaa gudaha u galay qeybta ay diyaarada istaagaan ee gudaha garoonka Aadan Cadde ee Muqdisho si ay isbitaalada ugula deg-degaan dad u badan haween iyo caruur oo dhaawacyo halis ah ay kasoo gaareen dagaaladii Kismaayo.
Dhaawacyada la keenay Muqdisho ayaa u badan dad qaba jajab lafaha ah, qaar madaxa ay xabado uga jiraan, kuwo xubno jirkooda ka mid ah waayay iyo dad miyir la’a oo dhamaantood ku waxyeeloobay dagaaladii Kismaayo ka dhacay toddobaadkii hore. Weriyaha raadiyoow Ergo ee Muqdisho Yusuf Axmed Kaynaan ayaa sheegay in dhawaacyada Muqdisho la keenay ay ka muuqday dhiig bax, oo aysan helin daryeel ku filan intii ay Kismaayo yaaleen.
Lixdan qof ee kusoo dhaawacmay dagaalada Kismaayo ayaa lakala jiifiyay isbitaalka Madiina oo si gaar ah loo leeyahay iyo isbitaalka Xalane oo ay maamulaan saraakiisha caafimaadka ee howlka nabad ilaalinta Midowga Afrika ee Soomaaliya.
Agaasimaha isbitaalka magaalada Kismaayo dhakhtar Cabdisamad Abuukar Xaaji ayaa raadiyow Ergo u sheegay in isbitaalka magaalada Kismaayo ay weli jiifaan lixdan qof oo kusoo dhaawacantay dagaalada magaalada ka dhacay islamarkaasna isbitaalku uusan laheyn awood ku filan baahiyada caafimaad iyo dawo ee ay qabaan dadkaas.
Dhakhtar Cabdisamad Abuukar Xaaji wuxuu intaa ku daray in isbitaalka ay daawo soo gaarsiiyeen hay’adda caafimaadka aduunka u qaabilsan Qaramada Midoobay ee WHO iyo hay’adda gargaarka ee ICRC, inkastoo dawooyinkaas ay hadda gabaabsi yihiin. Afhayeenka Raíisul Wasaaraha Soomaaliya Ridwaan Xaaji Cabdiweli ayaa raadiyow Ergo u sheegay in dowladda Soomaaliya ay dirtay saddexda diyaaradood ee dhaawacyada kasoo qaaday magaalada Kismaayo ee gobolka Jubbada Hoose.
Yusuf Axmed Kaynaan/MR
