Dowladda Koofur Afrika ayaa bilowday inay gunnooyin siiso qaxootiga Soomaaliyeed ee ku nool dalkaas, taas oo qeyb ka ah fulinta heshiiska caalamiga ah ee daryeelka qaxootiga. Gunnooyinkan dhaqaale ee ay dowlada bixinayso waxaa heliya dadka da’da ah ee aan shaqaysan karin, dadka baahiyaha gaarka ah qaba sida cuuryaanimada iyo cudurada dhimirka iyo carruurta.
Gunnooyinkan oo u dhigma ceyrta lasiiyo Soomaalida ku nool dalalka Yurub, Mareykanka iyo Kanada ayaa dowladda Koofur Afrika bilowday horaantii sanadkan kadib cadaadis uga yimid hay’adda arrimaha qaxootiga u qaabilsan Qaramada Midoobay ee UNHCR.
Dadka waayeelka ah ee aan shaqaysan karin da’da awgeed waxay dowladda Koofur Afrika bil weliba siindoontaa boqol iyo labaatan doolar oo uu ku kabto qarashka nolosha iyo kirada uga baxa. Dadka baahiyaha gaarka ah qaba sida cuuryaanimada waxay iyana qaadanayaan boqol iyo sideedan doolar bil weliba, halka carruurta ay xaq u yeelan doonaan labaatan iyo shan doolar bil weliba iyo lacagta dugsiyada iyo buugaagta oo laga bixiyo.
Cabdiqaadir Khaliif Maxamed oo ka mid ah jaaliyada Soomaaliyeed ee ku nool Koofur Afrika ayaa raadiyow Ergo u sheegay in gunnooyinkaas ay heli doonaan dadka qaxooti ahaan loo aqoonsaday oo keli ah. Cabdiqaadir Khaliif wuxuu intaa ku daray in carruurtana ay qasab tahay inay dugsiyada dhigtaan. Waalidka aan carruurtooda dugsiyada u dirin xaq uma yeelan doonaan gunnooyinka dowladdu ku taageerto qoysaska qaxootiga ah ee ku nool Koofur Afrika.
Mahdi Ibraahim Booloow oo ka mid ah qaxootiga Soomaaliyeed ee baahiyaha gaarka ah qaba ayaa ka mid ah dadka ka faa’iideysanaya taageerada dhaqaale ee ay dowladda Koofur Afrika bilowday inay u fidiso qaxootiga ku nool dalkaas.
Mahdi Ibraahim oo dhowrkii sano ee ugu dambeeyay ku noolaa magaalada Pretoria ee Koofur Afrika wuxuu raadiyoow Ergo u sheegay in gunnada ay dowladda siiso oo uu helay ilaa Janawari sanadkaan, uuna isaga bixiyo kirada guriga, raashina ku iibsado.
Si kastaba, Soomaali badan oo qaxooti ku ah Koofur Afrika ayaa diidan inayba qaataan lacagta cayrta ah ee dowladda u bilowday dadka qaxootiga ah ee ku nool dalkaas, cabsi ay ka qabaan in la diido codsigooda ah in dal saddexaad la dajiyo. Laakiin weriyaha Ergo ee Koofur Afrika wuxuu sheegayaain in uusan xariir ka dhaxeyn codsashada dal saddexaad oo deegaan ahaan loo geeyo qaxootiga iyo aqbalaada taageerada lacageed ee dowladda bixiso.
Cabdinaasir Sheekh Axmed/MR
