Khasaaraha ugu badan ee dagaalada ka socday magaalo xeebeedka Kismaayo saddexdii maalmood ee lasoo dhaafay ayaa gaaray dadka rayidka ah ee ku nool magaalada. Hubka ay isku ridayeen maleeshiyada ku dagaallamay magaalada ayaa ku dhacay guryo dad rayid ah ku nool yihiin oo sababay dhimashada dad ka badan toban qof oo shacab ah.
Hoobiye ku dhacay guri ku yaal xaafada Siinaay ee magaalada Kismaayo ayaa dilay labadii waalid ee qoys deganaa guriga, halka saddex ka mid ah carruurtooda uu gaarsiiyay dhaawacyo halis ah sida uu soo sheegayo weriyaha raadiyow Ergo ee magaalada Kismaayo.
Agaasimaha isbitaalka magaalada Kismaayo dhakhtar Cabdisamad Abuukar Xaaji ayaa raadiyow Ergo u xaqiijiyay in sideed qof oo dhaawac ahaan loo keenay isbitaalka ay iyana geeriyoodeen. Cabdisamad Abuukar Xaaji wuxuu intaa ku daray in dhaawacyo ka badan lixdan qof oo haween iyo carruur u badan isbitaalka la keenay saddexdii maalmood ee uu dagaalka socday.
Isbitaalka magaalada Kismaayo ma leh qolal ku filan oo dhaawacyada iyo bukaanada kale la jiifiyo sidaas darteed dadka ku dhaawacmay dagaalada ayaa lagu dabiibayaa dermooyin iyo sariiro la hoos dhigay geedo banaanka isbitaalka ku yaal. Agaasimaha isbitaalka magaalada Kismaayo dhakhtar Cabdisamad Abuukar Xaaji ayaa sheegay in isbitaalku ku filnaan karin baahiyada caafimaad iyo dawo ee ay qabaan lixdanka qof ee kusoo dhaawacmay dagaalada magaalada ka dhacay. Dhakhtar Cabdisamad Abuukar Xaaji wuxuu intaa ku daray in isbitaalka uusan haysan qalab ay ugu horayso raajo oo muhiim u ah wakhtigaan daaweynta dhaawacyadda iyo daawo ku filan oo lagula tacaalo dhaawacyada jiifa, oo xitaa ay gabaabsi ka yihiin dawooyinka horey u yaalay.
Isbitaalka magaalada Kismaayo oo ka mid ah xarumihii dowlada ee burburka kasoo gaaray dagaaladii sokeeye ee dabo-socday dhicistii dowladdii dhexe ayaan helin wax dayactir ah labaatankii sano ee lasoo dhaafay. Agaasimaha isbitaalka magaalada Kismaayo dhakhtar Cabdisamad Abuukar Xaaji ayaa ugu baaqay hay’adaha gargaarka iyo dadka Soomaaliyeed ba inay gargaar dawo iyo qalab caafimaad ah si deg deg ula soo gaaraan isbitaalka si loo badbaadiyo nolosha dhaawacyada isbitaalka jiifa.
Khadar Maxamuud Xareed/MR/MH
