Dhalinyaro ku nool xerada qaxootiga Dhadhaab ee Waqooyi bari Kenya oo soo dhammeystay xabsiyo dhaadheer oo ku yaalla gudaha Kenya , kadib markii falal dembiyeedyo lagu eedeeyay ayaa xirfadaha ay xabsiyada kasoo barteen uga shaqeysta gudaha xeryaha. Ayagoo bilaabay inay dhalinyarada ka wacyi geliyaan falal dembiyeedyada.
Sidiiq Ismaaciil Koosaar waa 27 jir, sanadkii 2004tii ayaa ciidamada Kenya ay kasoo qabteen xerada Xagardheer isaga iyo laba wiil oo saaxibbadiisa ah, kadib markii lagu eedeeyay inay nin dhaawac u geysteen, waxaana maxkamad ku taalla Nairobi ay ku xukuntay 7 sano oo xarig ah, isagoo xariggaasna kusoo dhammeystay xabsiga Kamiti ee magaalada Nairobi. Sidiiq ayaa waxaa lasoo daayay sanadkii 2011kii, wuxuuna haatan ku shaqeystaa xirfado uu xabsiga kasoo bartay.
“Inkastoo xabsiga aan kusoo qaatay nolol adag, haddana waxaan kasoo bartay xirfado ay ka mid yihiin harqaanka, sameynta kuraasta iyo miisaska iyo bacriminta beeraha, hadda waxaan ku shaqeystaa harqaanka.” Ayuu yiri Sidiiq.
Farxaan Maxamed Ismaaciil oo isagana ah 20 jir ah sanadkii 2011kii, ayaa waxaa laga xiray xerada Xagardheer isagoo 16 sano jir ah, kadib markii lagu eedeeyay fal kufsi ah oo gabar deriskooda ah uu u geystay, waxaana lagu xiray qeybta carruurta ee xabsiga Shimo La Tewa ee magaalada Mombasa. Wuxuuna halkaas ku xirnaa muddo sanad iyo bar ah.
Farxaan ayaa ku dooday in falka lagu soo eedeeyay uusan ku lug lahayn, isla markaasna taas caddeynteeda lagu waayay, sababta keentay in xabsi la dhigo haddii caddeynteeda lagu waayay dembiga lagu eedeeyay ayuu Farxaan ku sheegay “Adigoo carruur ah mar haddii maxkamad lagu horkeeno xitaa haddii dembiga lagugu waayo way adagtahay sidaad uga baxsato, waxaa dib loo eegayaa noloshaadii hore, taas ayaana lagugu xukumayaa. Anigana wax ma baran jirin markaan Xagardheer joogay.” Ayuu yiri Farxaan.
“Hab dhaqankeygii aad ayuu isku baddalay, waxaan iska daayay waxyaabihii xumaa ee waqtiyada ay iiga lumi jireen. Waxaan xabsiga ka soo faa`iiday waxbarasho, ugu yaran ma garaneynin luqadda Sawaaxiliga, waxaan kaloo bartay harqaanka, haddana waan ku shaqeystaa oo shahaado ayaan ka qaatay.” Ayuu yiri Farxaan.
Sidiiq iyo saaxiibbadiisa ay muddada xabsiga isla soo dhammeysteen ayaa wacyi gelinno u sameeya dhalinyarada xeradaas Xagardheer, si ay uga feejignaadaan falal dembiyeedyada ay xabsiyada ku muteysan karaan.
“Qiimaha qorriyadda waxaad dareemi kartaa markaad xabsiga ku jirto, waxaan ugu baaqayaa dhammaan dhalinyarada inay ka digtoonaadaan falalka xatooyada iyo dhaca ah iyo dembiyada kale, ka badbaadi naftaada inaad xabsi gasho.” Ayuu mar kale yiri Sidiiq.
Dhalinyaro badan oo la mid ah Sidiiq iyo Farxaan ayaa falalka dembiyeedyada waxaa ku kallifa shaqo la`aanta ka jirta xeryaha qaxootiga Dhadhaab, iyadoo dhalinyarada soo dhammeysay dugsiyada sare ee lacag la`aanta ah ee xeryahaas ku yaalla ay yartahay fursadaha ay jaamacado ku aadi karaan amaba ay uga shaqeysan karaan gudaha Kenya, sida uu qabo Sidiiq Ismaaciil.
Farxaan Lafoole/FM/AM
