Mashruuc ay hir gelisay hay’adda guddiga qaxootiga Denmark ee DRC ayaa ku dhowaad kun qoys oo ka mid ah barakacayaasha deggan gudaha Jaamacaddii hore ee Gahayr iyo deegaanka Zona-K ee degmada Hodan loogu sameeyey mashruuc nal loogu gelinayo guryaha barakacayasha oo baahi xooggan ay u qabeen dadkani, nalalkaan oo ku shaqaynaya qalabka loo yaqaan Solarka ee dabka ka qaata cadceedda qorraxda siina daaya iftiin fiican ayaa qaar kamid ah barakacayasha oo la hadlay raadiyo Ergo waxay sheegeen in wax badan uu ka baddalay ammaanka xerooyinka ay ku nool yihiin iyo noloshoodaba.
Faadumo Ibraahim oo ka mid ah barakacayaasha deggan gudaha Jaamacaddii hore ee Gahayr ayaa sheegtay inay qabeen dhibaatooyin ay ugu horreysay in xilliga habeenkii aysan bannaanka u soo bixi karin cabsi kooxo burcad ah oo ammaankooda dhibaateeya, taasina ay keeni jirtay inaysan soo aadin musqul haddii ay u baahdaan “Ma jirin habeenkii Iftiin mana u soo bixi jirin bannaanka waayo waxa ay ahayd mugdi, waxaana jiray tuugo soo gala kaamka, haweenkana kufsada ama dhaca” waxaa sidaasi u sheegtay Ergo hooyo Faaduma.
Xilli habeen ah oo aan tegay kaamamka helay mashruuca Nalaynta, ayaa waxaa guud ahaan ka muuqday iftiin suura geliyay in ay ifaan guud ahaan kaamka, qaar ka mida barakacayaasha ayaa sidoo kale sheegay in ay kaga faa iidaystaan in ay ku adeegtaan xilliyada habeenkii sida ay u sheegtay Ergo Aasho Maxamed “Waxaan helnay iftiin waxaa hadda noo ifo gurigga aan deganahay waxaan ku aqrisanaa buugta waana ku adeeganaa” waxaa tiri Caasho.
Caasha Qadar waa hooyo deggan deegaanka ZoneK waxa ayna sheegtay in ay qabeen walaac xooggan oo ku baahay kaamka xilli uu jiray mugdi dadkuna ay ka baqayaan kooxaha ammaanka barakacayaasha dhibaateeya laakiin markii ay heleen iftiinka xaalku uu yahay mid aad u wanaagsan.
Farxiyo Xasan waa hooyo leh 3 carruur ah xilli ay saacaddu ahayd 9:00 fiidnimo kula kulmay goob ay ka dhaansanaysay biyo waxaan waydiiyay xilligan waxa ku kalifay waxa ayna sheegtay in maalintii ay ka badin wayday carruurta iyo hawsha kale ee guriga, laakiin hadda oo ay heleen iftiin kaamka ay xilli walba ku adeegato, waxayna intaasi ku dartay in xilli hore ee subixii ah ay ku dubato canjeelada.
Marka aad marayso gudaha kaamamka, waxaad arkaysaa dhalinyaro iyo carruur badan oo ku ciyaara iftiinka, kuwaasoo ka mid ah dadka deggan xeryaha barakacayaasha, waxayna ciyaarayeen ciyaar kubadda cagta iyo ciyaaro kale, waxayna ku dhawaaqayeen erayo ciyaareed waxaana qaar ka mid ah ay u sheegeen raadiyo Ergo in ay ku ciyaaraan xilliga hore ee habeenkii.
Mashruucan Nalaynta ayaa waxaa fuliyay hay`ad samafal oo ka shaqaysa magaalada Muqdisho DRC sida ay u sheegtay Ergo mid kamida horjoogayaasha kaamaka laga hergeliyay, Caasho Xareed.
Abdulkadir
