Wejigii labaad ee tallaalka cudurka dabeysha ayaa ka furmay deegaannada Puntland, waxaana la qorsheeyay inay ka faa`iideystaan in ka badan 250,000 oo carruur ah iyo dad waaweyn isugu jira, kuwaasoo ku sugan saddexda gobol ee Nugaal, Bari iyo Sanaag.
Wasaaradda caafimaadka ee maamulka Puntland ayaa si rasmi ah u fulinaysa iyadoo taageero ballaaran ka helaysa hay`adaha QM ee WHO iyo UNICEF.
Dr. Cabdirisaaq Ducaale oo ah wasiir ku xigeenka wasaaradda caafimaadka ee Puntland ayaa Ergo u sheegay “Dufcadii hore ee tallaalka ahayd ee la fuliyey waxaa ka faa`iideystay in ka badan 245,000 Kun oo carruur ah, waxaa jirta dhib badan oo ay shaqaalah tallaalku qabeen, takhaatiir waaweyn iyo madaxda wasaaradda ayaa guryaha xitaa galay si ay dadka uga dhaadhiciyaan in tallaalku muhiim yahay.” Ayuu yiri wasiirku.
Wasiirka ayaa sheegay inay jiraan tallaabooyin badan oo fududeynaya in xanuunka fayrayska dabeysha uu ku soo fido deegaannada Puntland isagoo intaas ku sii daray in isu socodka dadka ee deegaannada kala geddisan ee dalka uu aad u badan yahay, wasiirka ayaa sheegay inay dadaal dheer u gelayaan in dadkoo dhan la tallaalo.
“Kiisaska dabaysha waxaa lagu arkay Bay iyo Banaadir, wuxuuna soo ritay dad dhowr ah, tallaalka ayaa ah waddada keliy ee looga hortegi karo, reer Puntland waxaan ka codsanaynaa inay carruurtooda uga faa`iideeyaan tallaalka dabaysha waa fursad weyn oo ka hortag ah, waana mid tayo leh, daawo ma leh balse waa laga hortegi karaa.”Sidaa waxaa yiri Dr. Ghulam Rabani Popal oo ah wakiilka Hay,adda WHO ee Soomaaliya.
Deegaannada Puntland ma jirto ilaa hadda kiisas cudurka dabeysha ah oo lagu arkay, balse waxaa jira taxadar weyn oo looga hortegayo in xanuunku uu ku soo faafo deegaannadan. ilaa 41 qof oo ku sugan koonfurta Soomaaliya ayaa cudurkaasi haleelay sida ay shaacisay wasaaradda horumarinta adeegga bulshada ee Soomaaliya.
Cabdiraxmaan Maxamed Xaaji/FM
