Qoysaska deegaannadooda kasoo barakacay ee ku nool xero ku taal duleedka degmada Baladxaawo ayaa ka cabanayaa cunto iyo hoy la’aan haysta. Qoysaskan ayaa ku nool guryo cooshado ka sameysan oo aan qorraxda maalintii iyo qabowga habeenkii midna celin karin.
Cabdulaahi Xasan Sheekh oo ka mid ah barakacayaasha ku nool xerada Ala-Aamin ayaa raadiyoow Ergo u sheegay in qoysas barakacayaal oo ka badan 100 qoys oo xerada ku nool aysan helin wax cunto gargaar ah muddo ka badan 15 bilood. Cabdulaahi Xasan wuxuu intaa ku daray in macluul daran ay sidoo kale ka jirto xerada, oo aysan ku dhaween xarumo caafimaad.
Dad ka badan toban qof ayaa xerada ku dhintay dhawaanahan, Cabdulaahi Xasan Sheekh wuxuu rumeysan yahay in dadkaas ay u dhinteen macluul iyo xanuuno ay ka qaadeen biyaha wasaqaysan ee webiga oo u jira xerada in ka badan 5 kiiloomitir.
Qoyska ku nool xerada Ala-Aamin ee duleedka degmada Baladxaawo ayaa colaado iyo abaaro is xig-xiga dartood uga soo qaxay gobollada Bay, Bakool, Shabeelada Hoose iyo qeybo ka mid ah isla gobolka Gedo.
Qoysaskan abaaraha iyo colaadaha kasoo barakacay ee ku nool xeryahaas ayaa u badan haween iyo carruur sida ay raadiyaha Ergo u sheegtay Saynab Xuseen Cusmaan oo ka mid ah barakacayaasha ku nool Ala-Aamin. Barakacayaashaas Soomaaliyeed ayaa ka codsaday hay’adaha gargaarka in gargaar cunto, hoy iyo dawoba lagu gargaaro qoysaska ku nool xeryahan.
Maxamed Macalin Aadan/MR
