12 qof ayaa labadii toddobaad ee lasoo dhaafay cudurka dabeysha ugu geeriyooday isbitaalka guud ee magaalada Beledweyne, sida ay xaqiijiyeen maamulka isbitaalka.
Agaasimaha guud ee isbitaalka Beledweyne Dr. Axmed Maxamed Khaliif ayaa Ergo u sheegay in dadkan oo isugu jiray dad waaweyn iyo carruur lagana keenay deegaanka Moqokori oo 168 km u jira magaalada Beledweyne ay baaritaan ay ku sameeyeen ku arkeen calaamadaha cudurka dabeysha.
Agaasimaha ayaa sheegay in 5 qof oo laga keenay Moqokori la keenay isbitaalka ay afar ka mid ah ku geeriyoodeen isbitaalka, halka 8 kalena inta aan isbitaalka lasoo gaarsiin ay ku geeriyoodeen Moqokori.
Dr. Axmed ayaa sheegay in sababta keentay in tiro intaas la ek ay u geeriyoodaan cudurka dabeysha ay tahay in tallaalka cudurka dabeysha uusan gaarin deegaanka Moqokori.
Dr. Cabdikariim Caseyr Cali oo ku takhasusay cudurka dabeysha ayaa sheegay in sababta aan tallaalka dabeysha loo gaarsiin deegaanka Moqokori ay tahay inaysan dowladda Soomaaliya gacanta ku heyn deegaankaas, loona gaari waayay sababo dhanka ammaanka ah.
Cudurka dabeysha oo dalka laga cirrib-tiray 2007dii ayaa waxaa dib kiiskii ugu horreeyay ee cudurka laga helay degmada Xamar Bile ee magaalada Muqdisho bishii May ee sanadkan, waxaaa halis ugu jira malaayiin carruur Soomaaliyeed oo aan helin tallaalka cudurka dabeysha. Wasaaradda caafimaadka ee dowladda federaalka Soomaaliya waxay xaqiijisay in cudurku ka jiro Banaadir, Bay, Shabeellaha Hoose, Gedo, Hiiraan iyo gobollo kale.
FM
