Iyadoo lagu guda jiro bisha barakeysan ee Ramadaan ayaa labadii toddobaad ee ugu dambeeyay waxa aad u kordhay weerarrada ka dhaca gudaha magaalada muqdisho kuwaasoo isugu jira dilal, qaraxyo, bambaanooyin lala beegsanayo dadweyne iyo goobo ganacsi iyo dagaallo toos ah oo dhowaanahanba ay ka nasatay magaalada Muqdisho.
Dadka la dilayo waxay isugu jiraan shacab, askar, ganacsato iyo mas`uuliyiin, waxaana ugu dambeysay dilalkii loo geystay Raxmo Daahir Siyaad, guddoomiye ku xigeenkii maamulka degmada Yaaqshiid ee gobolka Banaadir oo la dilay 17kii bishan xilli ay gurigeeda kusii jeedday iyo Dr. Cismaan Cabdiraxmaan Fiqi oo ahaa agaasimihii isbitaalka Daarul shifaa ee Muqdisho waxaana la dilay 19kii bishan.
Maamulka gobolka Banaadir ayaa ku doodaya in weli ammaanka Muqdisho lagu tilmaami karo mid la isku halleyn karo. Maxamed Yuusuf Cismaan oo ah afhayeenka maamulka gobolka Banaadir ayaa sheegay, “Amniga Muqdisho waa mid 100% la isku halleyn karo, amniga dadka ayaa gacantooda ku keensaday waxayna kala shaqeeyaan hay`adaha ammaanka.” Ayuu yiri afhayeenka.
Cabdikaafi Hilowle Cusmaan oo ah xoghayaha maamulka gobolka Banaadir oo ka hadlayay isu soo bax ka dhacay Muqdisho loogana cabanayo amni darrada soo korortay ayaase qaba in amni darrada ay qeyb ku leedahay dowladda isagoo u sababeeyay in dadaka dilalka iyo qaraxyada geysta marka lasoo qabto inaan cadaaladda la marin xabsigana maxkamad la`aan looga soo daayo.
“Dhammaan degmooyinka ma oggolaan karno in lasoo daayo oo lagu soo celiyo qof dad dilay, waxaan ka codsaneynaa dowladda inay arrintan fiiro gaar ah u yeelato.” Ayuu yiri Cabdikaafi.
Dowladda Soomaaliya ayaa sheegtay inay si aad ah u dareensan tahay amni darrada ka jirta magaalada, balse ay ku kooban tahay xaafadaha qaar, isla markaana lagala xisaabtami doono maamullada ay hoos tagaan xaafadahaas.
“Maxaa Wada jir, Hodan iyo Yaaqshiida kala duway, maamullada degmooyinka way kala garan karaan dadka qaska wada, way aqoonsan karaan dadka kusoo kordhay xaafadahooda ee waa inay soo qabtaan.” Sidaa waxaa shir jaraa`id oo uu saxaafadda u qabtay ku sheegay wasiirka warfaafinta Cabdillaahi Ciilmooge.
Khubarrada ammaanka ayaa sheegaya in dowladda ay weysay inta badan saraakiishii ammaanka gacanta ku heysay sanadihii ugu dambeeyay, sidoo kalana qorshayaasha ammaanka iyo tallaabooyinka la qaado uu ka muuqdo jileec badan. Jaamac axmed siyaad oo ah khabiir falanqeeya arrimaha ammaanka oo Muqdisho ku sugan ayaa sheegay,
“Daldaloolooyinka ammaan darrada dhan waa furan yihiin, dowladduna wax buuran kama qaban ammaanka Muqdisho, magaalada waxa soo galaya iyo waxa ka baxaya cedna ma koontaroosho, waddooyinka soo gala Muqdisho ma lahan koontaroollo yaalla, Muqdisho waxay hadda u ektahay dukaan qofkii lahaa inta uu albaabada u furay isga tegay oo qofkii doona uu galo wuxuu doonana ka qaato.” Ayuu yiri Jaamac.
Raysal waasaare Cabdi Faarax Shirdoon ayaa ballan qaaday in si deg deg ah wax looga qabanayo ammaanka magaalada Muqdisho, ayna jiraan qorshooyin ay waddo dowladda.
“Ammaanka waa walaaca ugu weyn ee ina heysta, waxaan ku hanweyn nahay inaan sameyno qorshey wax looga qabanayo, sida inaan guri guri magaalada Muqdisho u galno una hubinno ammaankeeda.” Ayuu yiri raysal wasaaraha.
Shacabka Muqdisho ayaa aad uga walaacsan sida ay wax u socdaan, iyagoo hadda ay dadka yareeyeen isu imaatinka meelaha qaar waxaa sidoo kale la adkeeyay ammaanka hoteellada, xarumaha dowladda iyo dhismayaasha ay hay`adaha deggan yihiin.
Yuusuf Keynaan/FM/AM
