Saddex carruur ah ayaa 29kii bishan deegaanka miyiga ah ee Balanbal oomane oo qiyaastii 5km dhanka waqooyi ka xigta degmada Balnballe ee gobolka Galgaduud ugu waxyeeloobay baaruudda hubka qarxa oo ay cuneen.
Saddexdan carruurta ah oo ahaa laba wiil iyo gabadh ayaa isku qoys ahaa waxayna da`dooda kala ahayd 6 jir, 4 jir iyo gabar 3 sano jir ahayd. Carruurta ayaa meel u dhow xaafaddooda ka helay baaruud ku jirtay qolof aad u duugoobay oo roobku uu soo saaray, baaruuddii oo budo ahayd ayaa waxay u ekeyd cabitaannada shushubka ee baakadaha ku jira, sidaas ayayna ku cuneen, sida uu Ergo u xaqiijiyay guddoomiye ku xigeenka degmada Balanballe Maxamuud Maxamed Cabdi.
Wiilkii carruurta ugu weynaa ee 6jirka ahaa ayaa u dhintay sunta baarudda uu cunay, iyadoo labadii carruur ee kalana loo qaaday isbitaalka Sacuudi oo ku yaalla degmada Caabudwaaq ee gobolka Galgaduud, waxaana lagu soo warramayaa in xaaladdooda caafimaad ay liidato, sida uu Ergo u sheegay Cadceed Cumar Cilmi oo ah agaasimaha isbitaalkaas.
Guddoomiye ku xigeenka Balanballe ayaa sheegay in dagmada iyo deegaannada ku hareereysan ee miyiga ah ay yihiin meelaha ugu khatarta badan gobolka ee ay ku jiraan haraadiga miinooyinka, oo aysan jirin ced si wanaagsan wax uga qabatay.
“Dagaallo sokeeye iyo kuwo shishiiye, gaar ahaan dagaalkii Itoobiya ayaa halkan ka dhacay, miinooyin badan iyo baaruudaha ku xiran afafka xabadaha ayaa dhulkan Galgaduud ku jira, inkastoo wacyi gelinno aan sameynay haddana carruur yaryar waxba kama oga wacyi gelin, waalidiinta ayaa la rabaa inay carruurtooda baraan inay ka fogaadaan waxyaabahaas.” Ayuu yiri Maxamuud Maxamed.
Maxamuud Cabdi Diirshe/FM/AM
