Waxaa beryhanba ka jirtay cabashooyin ka imanayay waddooyinka isku xira shabeellada Hoose iyo Muqdisho, kuwaasoo ka dhashay jidgooyooyin ay sameeyaan kooxo ku labbisan dareyska ciidamada dawladda.
Sida badan cabashadan waxay ka timid gaadiidleyda isticmaasha waddooyinkaas oo sheegay in laga qaato lacago badan taasoo ayan awoodin, haddii ayan dhiibinna ay ka dhalato dhibaato loo geysto dadka rakaabka ah, sida faraxumeyn loo geysto haweenka.
Isbaarooyinkan waxay ka soo bilowdaan meesha lagu magacaabo siinka dheer , deegaanka Ceelasha biyaha, deegaanka Lafoole halka loo yaqaan Shanta waxayna is daba yaalliin ilaa Afgooye sida uu idaacadda Ergo u sheegay weriye Maxamed Cabdi oo ku sugan degmada Afgooye.
Ciise Bariis oo ah guddoomiye ku xigeenka gaadiidleyda Afgooye ayaa ku tilmaamay iney u adkeysan waayeen dhibaatada joogtada ah ee dhaqaale iyo amni oo ay ku hayaan jidgooyooyinka. “ Ma aha mid aan u sii dulqaadan karno in nalaka qaato wixii aan maanta oo dhan shaqeyneynay, waxaa bixinnaa in ka badan hal milyan iyo wax ka sii badan iyadoo ay taasi inoo dheer tahay amni darro, sidaas darteed ayaa kalliftay inaan gebi ahaanba joojinno shaqadeennii” ayuu yiri Ciise Bariis.
Mar uu raadiyo Eargo weydiiyay inta ay sii wadi doonaan shaqo joojintooda wuxuu sheegay ee uu yiri” Ma jirto xilli go`an ee waxaan ka war sugeynaa ballamadii ay qaadeen hay`adaha aminiga oo haddii ay ku guuleysan waayanna waan wadi doonnaa shaqo joojinta gaadiidka”
“ Isbaarooyinku sharci maaha, mid aan og nahayna maaah, waa wax aan innagu la yaabnay, waddo walba oo aan u marnana xal aan u waynay, waxaan naga soo hartay uun keliya inaan dhahno Ilaah ummaddaas dhibka ha ka qaado” sidaasna waxaa yiri guddoomiyaha aminga deegaanka Afgooye Mahdi Xassan mar uu wareysi siinayay idaacadda Ergo.
Mar la weydiiyay Mahdi sababta keentay in wax looga qaban waayay arrintan maaddaama uu yahay guddoomiyihii amniga ee Afgooye, wuxuu ku jawaabay iney taasi la xiriirto iyadoo ayan dawladdu gacanta ku wada haynin hawlaha amniga ee deegaankaas, iyo ineyan ciidamadu qaadanin wax mushahar ah taasina ay keentay iney burcadda iyo kooxo kale oo dawladda ka soo horjeeda ay sidey rabaan ka yeelaan.
Wuxuu qiray guddoomiyaha amniga Afgooye oo kale iney jiraan dhibaatooyin kale oo la xiriira jidgooyooyinka oo ah in lagu faraxumeeyo haweenka, welibana ay halkaasi ka dhaceen dhowr fal oo ku lug leh kufsi. Falalkaas kufsiga lana xiriira jidgooyooyinkaas deegaanka Leega oo u jirta ilaa 30km degmada Wanla weyn, waxaana sidaas caddeeyay guddoomiyiaha degmada Leega Abuukar Cabdullaahi “Al caddaala oo sheegay in ilaa 5 haween ah oo mid uur leedahay lagu kufsaday deegaankaas sida uu ugu warramay weriye Maxamed Cabdi Afgooye.
Demada Marka ee Shabeellada Hose ayaa waxaa shalay lagu qabtay kulan weyn oo ay ka soo qaybgaleen gaadiidleyda Shabeellada Hoose iyo maamulka gobolkaas, waxayna ku ballameen in dhamaan laga qaado isbaarooyinka dhex yaal gobolkaas, layskana kaashado sii wax looga qaban lahaa. Hawlgalladan lagaga hortagayo jidgooyada ayaa marar badan ooh ore la qabtay hase ahaatee muddo ka dibba soo noqnoqda.
