Xaafadaha kala duwan ee magaalada Kismaayo ee xarunta gobolka jubbada hoose waxaa ka bilowday wajigii labaad ee ololaha tallaalka cudurka dabeysha, kaasoo ay fulineyso hay’adda caafimaadka adduunka ee WHO, waxaana ololahaan tallaalka ka faa’ideysanaya carruur badan oo ku nool magaalada Kismaayo kuwaasoo ay da’doodu ka hooseyso 10 sano.
Howlwadeennada WHO ee magaalada Kismaayo ayaa sheegay inay qorsheynayaan in wajiga labaad ee ololaha tallaalka cudurka dabeysha ay ku beegsan doonaan 30,000 oo carruurta 10ka sano ka yar, sida uu Ergo u xaqiijiyay Cabdixakiin Faarax Maxamuud oo ah guddoomiyaha hay’adda WHO ee degmada Kismaayo.
Carruurta barakacayaasha ah ee ku nool xeryaha kaamamka magaalada kismaayo ayaa kamid ah dadka diiradda lagu saarayo tallaalka ee ka faa’ideysanaya.
Hooyo Caasho oo ka mid ah barakacayaasha Kismaayo isla markaana 8 carruur loo tallaalay ayaa sheegtay in carruurteedu ay hadda aad u caafimaad qabaan isla markaana ay fahantay faa`iidada uu tallaalku leeyahay.
Cabdixakiin ayaa sheegay in gobolka Jubbada Hoose uu ka mid yahay meelaha ugu badan ee kiisaska cudurka dabeysha laga helay, isagoo sheegay in 6 kiis oo laga qaaday Kismaayo iyo Jamaame 3 ka mid ah laga helay cudurka dabeysha. Isagoo sheegay in xeryaha barakaca ay yihiin meelo ciriiri ah oo dadku ay isku cufan yihiin, oo ay dhici karto inuu si deg deg ah u faafo cudurka, sidaa darteedna ay diiradda u saarayaan inay tallaalaan canug walboo xeryaha barakaca ku nool.
Khadar Maxamuud Xareed/FM
