Waxaan istuudiyaha raadiyo Ergo wareyski kula yeelannay wariye Daa`uud Cabdi Daa`uud oo ah guddoomiyaha ururka arrimaha warbaahinta deegaanka ka shaqeeya ee SOMESHA, Daa`uud ugu horreyn wuxuu ka warramayaa waxa uu ururku ka shaqeeyo.
Daa`uud: SOMESHA waa urur ka shaqeeya arrimaha warbaahinta deegaanka, beeraha, caafimaadka iyo sayniska, wuxuuna tababar siiyaa weriyeyaasha, waxaan la asaasay sanadkii 2010kii
Ergo: Xagguu ka howlgalaa?
Daa`uud: Uurka xaruntiisa weyn waa magaalada Muqdisho, waxaan xarumo ku leennahay Puntland iyo Somaliland.
Ergo: Sababaha ururka loo sameeyay waa maxay?
Daa`uud: Markaan aragnay in weriyeyaasha inay ku liitaan soo tebinta arrimaha deegaanka iyo kheyraadka dalka, ayaan go`aansannay inaan ururkan sameyno si aan weriyeyaasha ugu tababarno tebinta arrimaha beeraha, cimilada, deegaanka, caafimaadka iyo sayniska iyo tiknolojiyada.
Ergo: Maxaa u qabsoomay muddadaas ururuka?
Daa`uud: Bishii Nofembar sanadkii 2011kii ayaan tababarkii ugu horreeyay weriyeyaasha ugu qabannay magaalada Muqdisho gobol walbana hal weriye ayaa ka yimid, waxaana garab nagu siiyay ururka weriyeyaasha deegaanka ee EFEJ oo aan xubin ka nahay. Waxaana weriyeyaasha la baray sidii ay wax uga qori lahaayeen deegaanka, beeraha iyo is beddelka cimilada adduunka oo ah arrimaha ugu muhiimsan ee maanta dunida ka jira. Bishii Maarso ee sanadkan dhexdiisana waxaan xarunta ururka jilaayaasha aan dowliga ahayn ee SOSCIENSA ku qabannay siminaar laba maalin ah oo ay kasoo qeyb galeen beeralleyda, takhaatiirta caafimaadka, ururrada bulshada rayidka ah iyo ardayda jaamacadaha, waxaana lagu gorfeeyay is beddelka cimilada.
Ergo: Waxaan ognahay in sanad walba dad Soomaaliyeed ay dhibaatooyin kasoo gaarto fatahaadaha webiyada iyo roobabka, sideed weriyeyaasha ugala shaqeysaan inay u soo tebiyaan?
Daa`uud: Run ahaantii weriyeyaasha waxaan siinnaa tilmaamo markay dhacaan fatahaado, tusaale ahaan fatahaadihii gobollada Shabeellaha Dhexe iyo Hiiraan waxaan weriyeyaasha ka caawinnay sidii ay u soo tebin lahaayeen, iyagana khibrad ayay u ahayd. Fatahaadahaas waxay u dhaceen iyadoo aysan dalka ka jirin hay`ado ka diga isla markaana xakameeya fatahaadaha, mana jiraan qorshe dowladeed oo loogu talo galay biyo xireenno lagu keydiyo biyaha si hadhow loo isticmaalo.
Ergo: Adinka haddaad tihiin ururka SOMESHA, yaa idinka taageera helitaanka khubarada ku takhasusay arrimaha deegaanka?
Daa`uud: Waxaan la wadaagnaa markey wax soo kordhaan hay`ad arrimaha degaanka ak shaqeysa oo lagu magacaabo ISIPPE , FAO, wasaaradda kheyraadka dowladda iyo UNODC, ayaga ayaa naga taageera arrimaha deegaanka.
Ergo: Yaa dhaqaale ahaan idinka caawiya tababarka weriyeyaasha?
Daa`uud: Ilaa hadda cid si rasmi ah noo caawisa malaha, marka laga reebo ururka arrimaha deegaanka ee EFEJ oo tababrkeennii ugu horreeyay aay kala kaashannay, waxaan ka codsan lahaa ced walboo arrimaha deegaanka ka shaqeysa inay nagala shaqeyso tababarka weriyeyaasha ee arrimaha deegaanka, beeraha iyo sayniska.
Mursal/FM
