Boqollaal qoys oo ku barakacay dagaal ka dhacay deegaanka Ceelcadde ee gobolka Gedo kuna sugan deegaannada miyiga ah ee deegaankaas ku teedsan ayaa sheegaya inay halkaas ku go`doonsan yihiin, oo ay qabaan baahiyaha cuntada, hoyga, caafimaadka iyo biyaha.
Qoysaskan oo tiradoodu tahay ku dhowaad 800 ayaa u barakacay tuulooyinka Lahelay,Diir diire, Warburrey iyo Qabri xaaji, waxayna ka barakaceen dagaal 23kii bishan deegaanka Ceelcadde ku dhex maray ciidamada Kenya iyo kuwa dowladda Soomaaliya oo isku dhinac ah iyo xarakada Alshabaab.
Xuseen Cali oo ka mid ah odayaasha deegaanka ayaa sheegay in qoysaska ka barakacay Ceelcadde aysan dib ugu soo laaban Karin guryahoodii, sababo la xiriira ammaanka oo aan la isku halleyn Karin, “Ma jiraan hay`ado gargaar oo qoysaskaas caawinaad u fidiyay, meel loo soo marsiiyo xitaa malaha haddii la gargaari lahaa.” Ayuu yiri Xuseen.
Xabiibo Muxumed oo ka mid ah qoysaskan ayaa Ergo u sheegtay in meel halis ah ay taagan tahay nolosha dadkii ka barakacay Ceelcadde, iyadoo sheegtay in mushkiladda ugu daran ay tahay helitaanka raashiinka iyo hoyga, sidoo kalana ay u baahan yihiin maro kaneecooyin ay isaga difaacaan cudurka duumada.
“Dadka qaar ayaa dib ugu laabtay deegaankooda, kadib markay xaaladdu ku adkaatay halkan, balse isla xalay ayaa dagaal kale uu deegaanka ka dhacay dib beyna usoo noqdeen, halkan barakacayaal ayaan hadda ku nahay, wixii aan heysannay guryaheenna ayaan uga soo tagnay.” Ayay tiri Xabiibo.
Saalixi/FM
