Ku dhawaad 4,000 oo qoysas Soomaaliyeed ah oo deegaanadoodii kasoo barakacay kuna nool 14 xero oo ku yaal gudaha iyo duleedka degmada Luuq ee gobolka Gedo ayaa ka cabanaya hoy iyo cunto la’aan iyo sidoo kale caafimaad iyo nadaafad darro. Barakacayaashan oo kasoo qaxay colaado iyo abaaro ku dhuftay qeybo ka mid ah gobolada Bay, Bakool, Jubooyinka iyo qeybo ka mid ah isla gobolka Gedo ayaa dhowrkii sano ee ugu dambeeyay ku noolaa xeryahaas ku yaal degmada Luuq.
Haddaba raadiyo Ergo ayaa wuxuu wareystay Saqaawi Sheekh Maxamed oo madax ka ah xerooyinka mid ka mid ahaa ayaa raadiyaha Ergo u sheegay in dhowrkii bilood ee u dambeeyey ay dadkan xaaladahooda ay sii xumaanaysan, iyagoo ka cabanaya cunno iyo biyo yaraan iyo adeegga caafimaad oo ciriiri ku ah. Hoos ka aqriso wareysiga aan la yeelanahay Saqaawi Sheekh Maxamed oo ka mid ah dadka deegaannadooda kasoo barakacay eek u nool xeryaha duleedka degmada Luuq.
Saqaawi: Waxaan ka mid ahay dadka colaadaha iyo abaaraha uga soo barakacay deegaanno ka tirsan Bay, Bakool iyo isla gobolka Gedo. Dhowrkii sano ee la soo dhaafay xerooyin ku yaal duleedka Luuq baan ku nooleyn. Awal waxaan gargaar ka heli jirnay hay’addaha gargaarka oo cunto nasiin jiray laakiin sida uu sanadka u bilowday saadka hay’addaha waa naga go’ay. Markaa abaar iyo cunto la’aan baa aad noo haysa. Amni xoogganna ma jiro, oo cabsi colaadeed baa iska jirta. Adeegyo caafimaad oo xooggan iyo nadaafadna ma jirto oo isbitaallo waa weyn ma leh.
Raadiyo Ergo: Marka ayaa awal cunto idinsiin jiray?
Saqaawi: Cid si toos ah cunto u siin jirtay ma leh. Hadba hay’adii cunto soo hesha ayaa noo keeni jirtay. hay’adda WFP ayaa ugu dambaysay wax cunto si toos ah noo siiya, iyadana hadda kala go’ baa ku dhacay. Markaa wax quudin joogto ah amaba aan joogto aheyn oo halkan [xerooyonka duleedka Luuq] ka jira ma leh. Dadkana baahi baa aad u haysa.
Raadiyo Ergo: dhanka caafimaadka maxaa dhib ah oo idinka haysta?
Saqaawi: Xerooyinka aynu ku noolnahay waxay ku yaallaan banaanka magaalada, mana leh xarun caafimaad. Haddii xilliga habeenkii ah ay dhacdo in haweeney xerooyinka jooga ay fool qabato isbitaal ma heli karto. Sababtoo ah degmada Luuq gudaha looma gali karo wixii casir ka dambeeya oo waa ay xiran tahay cabsi amni oo jirta awgeed. Markaa waa ay fiicnaan laheyd haddii xerooyinka dhowrka ah ee dadka soo barakacay ay ku nool yihiin isbitaal laga ag furi lahaa.
Raadiyo Ergo: Waa maxay baaqa aad direysaan?
Saqaawi: Waxaan ka codsanaynaa soomaalida iyo hay’adaha gargaarka ba inay gargaar cunto iyo mid dawo oo deg deg ah nala soo gaaraan. Baahi weyn baa meesha nagu haysta.
Maxamed Macallin/MR/AM
