300 oo qoys oo kasoo barakacay tuulooyin dhanka galbeed kaga beegan deegaanka Jannaale ee gobolka Shabeellaha Hoose ayaa dalbanaya in gargaar lala soo gaaro.
Qoysaskan oo kasoo barakacay tuulooyinka Kulaas iyo Boordi oo qiyaastii 5km dhanka galbeed kaga beegan deegaanka Jannaale oo fariisin u ah ciidamada AMISOM ayaa soo degay Jannaale bishii March ee sanadkan sababo dhanka ammaanka ah, iyagoo buushash halkaas ka sameystay .
Xasan Cabdi oo barakacayaashan ka mid ah ayaa Ergo u sheegay in baahiyaha ugu badan ee ay qabaan ay tahay dhanka hoyga iyo cuntada, “Dadkan alaabahoodii nxitaa way isaga soo tageen ayagoo naftooda u baqay, waxay dhexda u galeen dagaallada halkaas ka dhacay.” Ayuu yiri Xasan.
Xaliimo Xasan Maxamed oo ah hooyo leh 5 carruur ah ayaa sheegtay inay kasoo barakacday tuulada Kulaas oo ay ku lahayd beer yar oo ay falan jirtay, balse colaadaha ka jira halkaas ay ugu noolaan weysay.
Maxamed Idiris Cabdi oo ah guddoomiyaha deegaanka Jannaale ayaa sheegay in qoysaskan ay deegaannadooda uga soo barakaceen weerarrada dhex maraya ciidamada AMISOM iyo kooxda Alshabaab, wuxuuna ka codsaday dowladda Soomaaliya iyo hay`adaha gargaarka inay barakacayaashan caawimaad u fidiyaan.
Aadan Diyeeshe/FM
