Kumanaan qaxooti Soomaali ah oo ku nool xeryaha Dhadhaab oo ay adag tahay in laga helo waxbarasho jaamacadeed iyo dugsiyo lagu barto xirfado shaqo ayaa ka faa’iideysanaya mashruuc deeq waxbarasho iyo xirfado ah oo xeryaha laga bilaabay.
2450 qof oo ay da’doodu u dhaxeyso 18 ilaa 59 sano ayaa ka faa’iideysan doona mashruucaan oo ay maalgalisay hay’adda qaxootiga u qaabilsan Qaramada Midoobay oo sanad socon doona.
Muuse Cabdi Xasan oo ku nool xerada Dhagaxleey ee deegaanka Dhadhaab ayaa ka mid ah dad ka badan 1087 qof oo tababar xirfado shaqo ah ka helay mashruuca oo bilowday bishii Jannaayo ee sanadkan. Dadkan oo wayeel u badan isuguna jira haween iyo rag ayaa baranaya farsamada xarqaanka, Cillaan-saarka iyo xirfado kale.
Muuse ayaa ka bartay mashruuca oo ay fulinayso hay’adda qaxootiga u qaabilsan dowladda Denmark farsamada naqshadeynta iyo tolliinka dharka.
Muuse Cabdi Xasan oo 50 sano jir ah oo afartii sano ee lasoo dhaafay kula noolaa qoyskiisa oo ka kooban lix caruur ah iyo hooyadood xeryaha Dhadhaab horey uma helin fursad waxbarasho iyo mid xirfadeed toona. Muuse oo ah gaari-gacanle ka xoogsada xeryaha Dhadhaab ayaa raadiyaha Ergo u sheegay in ugu dambeyn uu leeyahay xirfad uu ku shaqeynsan karo, oo uu ka heli karo nolol maalmeedka qoyskiisa.
Muuse Cabdi Xasan ayaa ku hanweyn inuu helo xarqaan u gaar ah oo ku shaqeysto si uu uga nasto shaqada dhibta badan ee xamaaliga oo aan mustaqbal dheer usii laheyn. Muuse ayaa sidoo kale Ergo u sheegay inuu hadda ka kaaftoomi karo ku tiirsanaanta gargaarka cunto ee laga sugo hay’adaha gargaarka.
Isaaq Maxamed Garaad oo ah madaxa dhinaca arrimaha nolosha ee xafiiska xeryaha Dhadhaab ee guddiga qaxootiga u qaabilsan dowladda Denmark ayaa raadiyaha Ergo u sheegay in dad kale oo qaxooti ah oo ku dhow 1500 oo dhameeyay waxbarashada dugsiga sare la siinayo fursado waxbarasho jamaacadeed oo lacag la’aan ah.
Dadkaas ayaa loo diri doonaa jaamacadaha Kenya ku yaal, halka qaarkoodna xarumo waxbarasho looga furayo gudaha xeryaha oo ay wax ku bari doonaan macalimiinta jaamacadaha Kenya ka socda.
Afartan boqolkiiba dadka ku nool xeryaha Dhadhaab ee da’doodu u dhaxeyso 18 ilaa 59 sano ma haystaan wax shaqo ah sababtoo ah ma leh xirfad iyo aqoon ay ku shaqeysan karaan. Si kastaba, konton boqolkiiba dadka ka faa’iideysanaya mashruuca waa haween.
Muxyadiin Axmed Roble/AM
