Saraakiisha iyo Howlwadeennada qeybta caafimaadka hay,adda WHO ee gobolka Gedo ayaa warbixin ay soo saareen waxaa ay ku sheegeen in carruur tiradoodu ay gaareyso 120kun oo carruur ah, da’dooduna ay ka yartahay ilaa toban sano in ay ka talaaleen cudurka Dabeysha shantii maalmood ee la soo dhaafey, ololahayaan ayaa ka fuliyeen degmooyinka Garbahaarrey, Luuq, Ceelwaaq, Doolow, Baladxaawo, Geedweyne iyo weliba dhamaan tuulloyinka hoos yimaad degmooyinkaasi.
Isuduwaha xafiiska Hay’adda caafimaadka aduunka ee WHO xafiiskeeda Gedo Maxamed Sheekh Cali ayaa idaacada Ergo u sheegay in howsha fulinta tallaalka ee gobolka ay qeyb ka tahay ololaha looga hortago cudurka Dabeysha, oo dhowaan la soo sheegay 19 kiisas carruur qabta Dabeysha oo lagu arkey deegaano ka tirsan Koonfurta Soomaaliya.
Maxamed Sheekh Cali ayaa intaasi ku darey barnaamijka tallaalka in ay barbar socdaan wacyigelinta hooyooyinka loo sameynayo oo la xariirta nadaafadda, baritaanka cudurka Jadeecada. Maxamed Sheekh Cali wuxuu sidoo kale sheegay in dadka laga wareysanayo cudurka Dabeysha si loo helo xog ku saabsan in cudurkaas dalka ka dhamaaday iyo siday dadku ugu baraarugsanyihiin.
“Caasho Maxamed oo ah hooya deggan degmada Luuq oo saddex carruur ah oo ay dhashay ka tallaashay Dabeysha ayaa ku boorrisay in hooyooyinku carruurtooda tallaalaan si caarruurtoodu uga nabad-gasho cudurka Dabeysha.
Caasha ayaa intaa ku dartay in dagaallada gobolka ka dhaca iyo barakaca ay sabab u noqdeen in carruurtu si joogto ah u helin tallaalada cudurrada lixda ee dilaaga ah.
Fulinta barnaamijka tallaalka Dabeysha looga hortago ee gobolka Gedo ayaa waxaa iska kaashaday hay’adaha caafimaada adduunka ee WHO iyo UNICEF. Waxaa mashruuca tallaalka fuliyay shaqaalo si tabarrucaad ah ku shaqeynayay oo gaaraya 500 oo qofood oo ka yimid degmooyinka gobolka.
Waana marki afaraad mudo 6 bilood gudahooda ah oo talaalka cudurka dabeysha ah laga fuliyo inta badan degmooyinka Gobolka Gedo.
Saalixi/MH
