Afar carruur ah oo da,doodu ka yartahay 8 sano isku qoys ah ayaa ku geeriyooday, waxaana ku gubtay 225 guri oo kuwa cooshadaha ka sameysan ah kadib dab xooggan oo ka kacay xerada Kaam Ajuuraan ee magaalada Garoowe, xeradaan oo ay ku nool yihiin dad ka soo barakacay abaaraha iyo colaadaha gobollada koonfureed ee dalka, dabka ayaa ku qasbay 200 oo qoys inay dib usii barakacaan.
Aadan Mukhtaar oo ku jira guddiga kaamka oo la hadlay raadiyo Ergo ayaa wuxuu sheegay “Booliskii ayaa na soo gaaray dabku wuxuu kacay goor barqo ah 9:30, ma garan karno wuxuu ka bilowday balse waa naloo soo gurmaday, wax kastana way dhammaadeen oo waad u jeeddaan dab damiskii ayaa weli howsha ku jira dadkii oo dhanna way ka qeyb qaateen howshaan masiibada ah ee meesha ka dhacday, arrin ka timid xag Rabbi”.
Nuuraani Siciid oo ah Aabbaha dhalay carruurta isku qoyska ah ee dabka ku gubtay ayaa isna raadiyo Ergo u sheegay inay ka maqnaayeen guriga oo ay magaalada u shaqo tageen” Saddex gabdhood iyo wiil ayey ahaayeen, waxaan aruurinayaa meydkoodii hadda oo aad u jeeddaan, guriga ayaa ku xirnaa aniga shaqo ayaan ku maqnaa hooyadoodna iskuul dhammaantood way dhinteen”, ayuu yiri Nuuraani.
Gaadiidka dab damiska iyo laamaha booliska ee Garoowe ayaa si dhaqso ah u gaaray goobta dabku ka kacay, iyagoo qeyb weyn ka qaatay in la bad baadiyo guryihii kale ee dadka barakacayasha, sidoo kale booliska ayaa baaris ku sameeyey sababta keentay in dabkaasi koco balse wax natiijo ah ilaa hadda lagama soo saarin, waxaana jira dabayl xagaa daran xilli uu Kaam ajuuraan ku yaallo meel bannaan ah oo ka tirsan Garoowe.
“ Howsha dab damiska horey ayaan ka ka bilownay aad ayaan ugu dadaalnay inaan badbaadinno meelaha kale ee kaamka ka mid ah ee uusan dabku gaarin, waa arrin adag oo xaalad cusub iyo nolol adag ku ah dadka barakacayaasha ah ee halkaan deggan, ganacsatada, maamulka, hay,adaha iyo dadka rayidka ah waxaan ka codsanaynaa in ay dadkan u gargaaraan” ayuu yiri Qaasim Cabdi oo ah xoghayaha dowladda hoose ee Garoowe.
Dhowr jeer oo hore ayaa maamulka iyo hay,adaha taageera barakacayaasha waxay digniin ku aaddan dhibaatooyinka dabka ee waqtiga xagaaga ay u jeediyeen dadka deggan Kamamka, 200 oo qoys in ka badan ayaa haatan barakacay oo dulsaar ku ah dadka dariska la ah guryahoodii gubtay kuwa kalena waxay la nool yihiin dadka deggan xeryaha Jowle ee duleedka Bari ee Garoowe.
Cabdiraxmaan Maxamed Xaaji.
