Warbixin ay si wada jir ah usoo saareen hay`adda cuntada iyo beeraha u qaabilsan QM ee FAO iyo shabakadda hannaanka ka digista macluusha ee FEWSNET ee uu maal geliyo Mareykanka ayaa lagu sheegau in 260,000 oo qof ay jaago ugu dhimatay Soomaaliya sanadihii 2010kii iyo 2012kii.
Macluusha oo xooggeeda ku dhufatay koofurta iyo bartamaha Soomaaliya, kala bar dadka u dhintay waa carruurta shanta sano ka yar. Qiyaastii 5 boqolkiiba tirada guud ee dadka iyo 10 boqolkiiba carruuta da’doodu ka yartahay shan sano ayaa ku dhintay koofurta iyo bartamaha dalka.
Tirada dadkii ku dhintay macaluushii dhacday intii u dhexeysay Oktoobar 2012-kii iyo Febraayo 2012-kii aad ayay uga badneyd intii markii hore la filayay. Waxay xitaa ka badan tahahy dadkii macluusha ugu dhintay Soomaaliya sanadkii 1992 oo lagu qiyaasay 220,000 oo qof, sida warbixintan lagu sheegay.
Xiriiriyaha arrimaha bini`aadannimada ee QM u qaabilsan Soomaaliya, Philippe Lazzarini ayaa sheegay in beesha caalamka ay qaban kartay shaqo tii hore ka badan, si looga hortago abaarta iyo macluusha isbiirsaday.
“Digniinihii soo bilowday markii ay abaartu dhacday 2010-kii ma ayan dhalin in xilli hore la qaado tallaabooyin ku habboon,” ayuu yiri Mr Lazzarini. Wuxuu kaloo sheegay in qiyaastii dad ku dhow saddex milyan ay wali u baahan yihiin gargaar naf-badbaadin ah iyo taageero si ay u dhistaan nolol-maalmeedkoodii.
Macluusha ayaa markii ugu horreysay bishii Luulyo 2010-kii looga dhawaaqay qeybo ka mid ah gobollada Bakool iyo Shabeelaha Hoose, mar dambena waxay ku fidday deegaanno kale oo ay ka mid tahay Shabeellaha Dhexe iyo xeryaha dadka soo barakacay ee Muqdisho.
Agaasimaha haya`dda Oxfam ee Soomaaliya Senait Gebregziabher ayaa isagana sheegay in macluusha aysan aheyn dhacdo dabiici ah, laakiin ay tahay fashil siyaasadeed.
“Caalamku aad ayuu uga gaabiyay inuu ka jawaabo digniintii abaarta, taasoo ay uga sii dartay colaadaha Soomaaliya, markii dambana dadku ay ugu kacday noloshooda.” Ayuu ku yiri Mr Gebregziabher.
Dhaqaale-yahan sare oo ka tirsan FAO, kana mid ah qorayaasha warbixintan Mark Smulders ayaa sheegay in macluusha dhacday sanadihii 2010kii iyo 2012kii ay cashar u noqon doonto beesha caalamka oo ay wehliyaan dadka gobolka, si loo dhiso mustaqbal xooggan kana adkeysi badan sidii hore.
