6 kalluumeysato ah u dhashay dalka Kenya ayaa dalbaday in dib loogu celiyo dalkooda Kenya markii ay muddo lix bilood ah ku sugnaayeen magaalada Boosaaso ee maamul goboleedka Puntland.
Kalluumeysatadan oo ka soo jeeda gobolka xeebta ee Mombasa ee dalka Kenya ayaa markab ay wateen wuxuu ku kharribmay xeebaha Putland dabayaaqadii sanadkii tagay 2012dii.
Tirada guud ee kalluumeysatan oo markii hore ahaa 8 ayaa labo ka mid ah waxay dalbadeen iney degganadaan Boosaaso halkaasoo ay ka heleen frusad shaqo iyadoo intooda kalena ay dalbadeen iney ku noqdaan dalkooda Kenya.
Cabdicasiis Samatar Jaafaan oo ah agaasimaha gaadiidka iyo dekadaha ee Puntland oo ka hadlayay sagootin loo sameeyay dadkan ayaa wuxuu uga mahadceliyay ha`yadda IOM sida ay gacan uga siisay daryeelka dadkan muddadii ay ku sugnaayeen Puntland.
Aysek Emuni oo ah madaxa hay`dda IOM ee Soomaaliya ayaa isaguna halkaas ka hadlay, wuxuuna uga mahadceliyay maamulka Puntland sida ay gacanta u siiyeen kalluumeysatadan , wuxuuna intaas ku daray iney tani dhiirrigelineyso hannaanka wada shaqeynta caalamiga ah ee IOM iyo Puntland.
“Sharciga la yiraahdo AVR wuxuu qorayaa in dadka lagu celinayo dalkooda hooyo la helo oggolaansho , sidaas darteed waxay qaadatay waqti dheer si ay Kenya u xaqiijiso iney dadkan u dhasheen dalka Kenya, ugu dambeyntiina waxaa la helay jawaabtii taasoo keentay in maanta kallumeysatadan dib loo celiyo” ayuu yiri Aysek.
Nelson Maguzi oo ka mid ah kallumeysadaas ayaa isaguna halkaas uga mahadceliyay sidii loola dhaqmay intii ay joogaan Boosaaso, iminkana uu ku faraxsan yahay inuu dib ugu laabto dalkiisii.
Aminaladan/AM
