Xaaluf ballaaran oo ay maraakiib kuwa shisheeyaha ah wadaan ayaa ka socda deegaanno badan oo ka tirsan gobollada Mudug iyo Nugaal, sida ay haatan muujinayso cabasho ka soo yeeraysa waxgaradka iyo maamulka deegaanka Garacad ee gobolka Mudug, kuwaasoo maamulka Puntland ka dalbaday in arrintaas wax laga qabto.
Nabaddoon Jaamac Ciise Xirsi Jiindhe oo raadio Ergo kula hadlay Garoowe wuxuu sheegay in deegaankaasi uu ka soo kabanayo falalkii Burcad badeeddu halkasi ka wadeen muddada dheer, kaasoo soo afjarmay markii ay dagaal mideysan la galeen shacabka, maamulka iyo dowladaha la dagaallama burcad badeedda, waxaase arrintaasi beddelay jariif ay wadaan maraakiib waaweyn oo hubaysan oo aan la aqoon meel laga leeyahay.
“Burcad badeeddu muddo ka badan 4-sano ayey halkaasi joogeen, balse waa laga adkaaday hadda, waxaase jira hadda burcad badeed kale oo beddelay kuwii hore waana kooxo calooshood u shaqeystayaal Soomaali ah oo dalka ku soo hoggaamiya maraakiib waaweyn oo dalal kale leeyihiin kuwaasoo xaaluf ba`an wada. Xeebaha Eyl ilaa Garacad ayey arrintaasi ka socotaa,” ayuu yiri Nabaddoon Jiindhe.
Wasiir ku xigeenka dekedaha iyo la dagaallanka burcad badeedda Cabdishakuur Mire Aadan ayaa Ergo u sheegay inay jiraan maraakiibtaani jiriifku, ayse dad ganacsato ah oo reer Puntland lug ku leeyihiin keenista maraakiibtaan jariifka ah xeebaha Puntland, isagoo ka gaabsaday inuu farta ku fiiqo kuway yihiin.
Maamulka iyo waxgaradka degmada Jariiban iyo deegannada hoostaga oo ay ka mid tahay Garacad waxay sheegeen inaysan awood u lahayn inay wax ka qabtaan arrintan, dhowr jeer oo hore ayey cabashooyin gudbiyeen balse haatan waxay wadaan qorshe ay isku kaashanayaan maamulka Puntland iyo dadka deegaankaasi si ka hortag wanaagsan loo sameeyo.
“Ma jiraan cid wax ka qaban karta marka la eego dhanka dadkeenna shacabka ah, maraakiibta NATO waxay qabtaan Burcad badeedda oo dhowr jeer ayaan dacwad u gudbinnay waxayse noo sheegeen inaysan sharci u lahayn inay taas fara gelin ka sameeyaan oo ay shaqadoodu tahay inay qabtaan Burcad badeed wata hub oo doonaya inuu wax afduubto.” sidaasi waxaa Ergo u sheegay Nabaddoon Jiindhe.
Cabdiraxmaan Xaaji/MH/FM
