Gobollada Mudug, Nugaal, Sool iyo Bari ee Puntland waxaa ka bilowday mashruuc ballaaran oo ay fulinayso wasaaradda xanaanada xoolaha ee maamulka Puntland, kaasi oo cudurrada Jadeecada iyo Furuqa lagaga tallaalayo 4 Milyan oo Neef iyadoo si la mid ah howlaha tallaalka la daaweyn doono 600 oo kun oo Neef oo iyana ka mid ah xoolaha gobolladaasi jooga.
“ FOA ayaa dhaqaale ku bixisay in uu hir galo tallaalkan oo ah mid muhiim u ah ilaalinta faya qabka xoolaha, annaga oo wasaaradda xanaanada xoolaha ah ayaa fulineyna waxaa la qorsheeyey in ay 4 Milyan oo neef tallaal helean gobolladaas afarta ah, kooxo takhaatiir xoolaha ah ayaan dirnay” ayuu yiri Cabdiweli Xirsi Nuur wasiir ku xigeenka xanaanada xoolaha.
20 kooxood oo takhaatiir ah ayaa bixinaya tallaalka, isla markaasna muddo laba bilood ah ka wadi doona gobolladaasi, madax ka tirsan maamulka oo ka qeyb galay munaasabaddii lagu sagootinayey kooxaha tallaalka fulinaya waxay kula dar daarmeen in si wanaagsan ay u fuliyaan howshaasi adag, dhinaca kale dhaqaatiirta ayaa wasaaradda iyo hay,adaha ka dalbaday in lala socdo howshooda lagana caawiyo arrimo la xiriira habka qaboojinta tallaalka oo is beddel ku iman karo haddii aan lagu hayn goob qaboojiye la’aan ah.
Xoola dhaqata ayaa ah kuwa aan fahan fiican ka heysan muhiimadda uu leeyahay tallaalka, taasina wa mid caqabad adag ku ah howlaha shaqo ee la xiriira tallaalka xoolaha. Axmed Cali oo ka mid ah takhaatiirta fulinaya wuxuu kooxdiisa kula dar daarmay in ay u dhabar adaygaan duruufaha adag ee safarka iyo weliba kuwa ay kala kulmi karaan dadka reer miyiga ah.
Wasiir ku xigeenka xanaanada xoolaha Puntland Cabdiweli Xirsi ayaa yiri “Looma baahna in marka la idika diido tallaalka aad ka tagtaan dadka xoolahaas haysta ,ku cel celiya dadka oo fahansiiya, culimada diinta, iyo oday dhaqameedka deegaanka adeegsada si looga dhaadhiciyo dadka reer guuraaga ah xoolaha loogu tallaalo, waxay la micno tahay reer baad xoolo u tallaalsheen balse reer kale ayaa xoolahoodii cudur qabaa taasna waxay la micno tahay in aydin guuleysan waa iga dar daaran”
Tallaalkan xoolaha oo sanadkiiba mar la fuliyo wuxuu ku soo beegmayaa xilligan oo bilihii la soo dhaafay ay gobollada Mudug,Nugaal iyo Sool ka jireen cudurro dhibaato ba,an ku hayey xoolaha nool sida cudurka Furuqa oo raadkiisa aad looga dareemay dhulka miyiga ah ee gobolladaasi.
Cabdiraxmaan Xaaji/MH/FM
