Horumar dhanka wax soo saarka khudaarta ayaa kasoo bidhaamay gobollada maamul goboleedka Soomaaliyeed ee Puntland, iyadoo khudaarta laga isticmaalo deegaannada ay ka timaaddo gudaha Puntland, marka laga reebo mooska, canbaha iyo liin bambeelmada oo weli aan laga beerin halkaas, sida ay sheegtay wasaaradda beeraha.
“Dadku waa inay istcimaalaan raashiinka gudaha dalka laga soo saaro, waa horumar la taaban karo in dadku ay ku baraarugeen inay maalgashadaan dhanka wax soo saarka beeraha“ Sidaa waxaa yiri wasiirka beeraha Puntland, Maxamuud Xaaji Saalax Biriishkalo, oo ka hadlayay kulan lagu soo bandhigayay horumarka wax soo saarka beeraha Puntland oo toddobaadkii hore lagu qabtay magaalada Garowe, kaasoo ay goob jog ka ahaayeen barnaamijka cuntada adduunka WFP, hay`adda beeraha QM ee FAO iyo NGOga ADESO.
Wasiirka ayaa ugu baaqay beeralleyda Puntland inay sii horumariyaan wax soo saarkooda oo ay hiigsadaan wax soo saarka dalagyada kala duwan sida haruurka, galleyda iyo digirta ee loo yaqaanno cunnooyinka aasaasiga ah.
Faadumo Jibriil oo ah madaxa ADESO oo kulankaas ka hadashay ayaa sheegtay in dhul walba uu ku wanaagsan yahay wax soo saar gaar ah, sidaa daraaddeed loo baahan yahay in beeralleydu ay deegaannadooda ka beertaan wax soo saarkii ku habboon.
Wasiirka beeraha ayaa uga digay beeralleyda inay ka digtoonaadaan suntan ay u isticmaalaan beeraha, taasoo uu sheegay in lagu sumoobo ayna sababto dhimasho, “Aqoon darro darteed ayay beeralleyda qaar u isticmaalaan sun ay farmashiyayaasha kasoo iibsadaan oo ay doonayaan inay cayayaanka kula tacaalaan, balse waa khatar weyn.” Ayuu yiri wasiirku.
Dhulalka Howdka, Sool, Nugaal, Gebi, Buuraha iyo Gubban ayaa ah dhul ku wanaagsan beeraha, waxaana ka baxa Timir iyo Beeyo ay can ku tahay Puntland.
Mudane Biriishkalo ayaa sheegay in timirta ka soo go`da beeraha Seyn, Bareeda, Galgala iyo Laag ee gobolka Bari haddii la horumariyo ay Soomaaliya uga maarmi karto timirta dibadda uga timaadda.
Marka laga soo tago biyaha laga helo roobka ee beeraha lagu waraabiyo, beeralleyda Puntland waxay ku tiirsna yihiin ilaha biyaha ah ee ka yimaada buuralleyda Golis ee gobollada Bari iyo Sanaag kuwaasoo ah kuwo aan kala go, lahayn xilli kasta.
Cabdiraxmaan Xaaji/FM/AM
