Ugu yaraan labo carruur ah ayaa ku dhintay kaddibmarkii ay qaadeen daadad ku soo rogmaday tog weyn oo ku yaalla deegaanka Bur-Daar oo 38 KM dhinaca koonfur kaga beegan magaalada Beledweyne ee gobolka Hiiraan maalinimadii arbacada ee 27 bishan.
Carruurtan ayaa ahaa walaalo isku da’xigay, oo daádooduna ay kala ahayd 9 sanno iyo 11 sano kana soo jeeda qoys xoolo dhaqato ah oo degan deegaankaas, sida ay idaacada Ergo u xaqiijiyeen.
Sida uu xaqiijiyey aabaha labadan carruurtan ah Ibraahim Muxumed waxa ay carruurtiisa ay dhinteen kaddibmarkii daadad ka dhashay roobab daáy inkabadan 8 saacadood, xilli ay ari kula joogeen toga loo yaqaano Arabow ee halkaas ku yaalla.
“Xoolo ayeey saaka u raaceen carruurteeyda toga Iriboow markay saacaddu ahayd 2:00 duhurnimo ayaa roob xoogan oo dhibic culus iyo hanfi wato uu yimid , caruurtu waxa ay si lama filaan ah u raaceen toga, haddana waxaana gurmad ay sameeyeen dadka deegaanka lagu guulaystay in la helo meydkooda”. Ayuu sheegay Ibraahim Muxumed
Sida uu sheegay Ibraahim, markii roobkii qayoodey ayaa hooyada carruurta waxa ay ka wardoontay labada cunug balse nasiib daro waxa ay oggaatay in carruurtii maqanyihiin”.
Sanadkii hore xiliga Guga ayaa isla deeggaankan waxaa sidan oo kale uu toggaasi qaaday labo carruur ah oo goobta ku dhimatay, kuwaas oo iyaguna ahaa xoolo raacato”.
Xiliyadan roobaabkan ay billawdaan ayaa waxa carruurta ku nool qeybo kala duwan oo Soomaaliya ah ay halis kala kulmaan biyo awooda badan ku socda oo ay u nugulyihiin in ay qaadan.
Isla roobab kuwaas lamid ah oo watay dabeylo ayaa ka daáy deeganada Ceel-weyne, Bahaley, Godob yar iyo Ceel-qaanso ee galbeedka Buurtinle arbacadii.
Inkastoo aanan ilaa iyo hadda la soo sheegin wax khasaare naf dadeed ah oo ay roobabku gaysteen khasaare kale oo xagga dhaqaalaha ah oo aad u weyn ayaa ka dhashay kaddib markii ay biyaha roobabkaasi iyo dabeylo ay dileen inkabadan 300 oo neef oo xoolo ah, iyagoona barakiciyay ilaa 23 qoys sida uu xaqiijiyay guddoomiyaha degmada Burtinle Liibaan Maxamed Xirsi.
Guddoomiyaha ayaa sheegay in ay soo kormeereen khasaaraha, ayna ogaadeen in dabaylo qabow oo ay wateen roobabka ay dileen intabadan xoolaha.
Mahdi Cali wuxuu ka mid yahay dadka deegaanka Ceel-weyne ee Burtinle, ahna deegaan kamid ah goobaha ay roobabkaas khasaareha u gaysteen. Wuxuu ka warbixiyay wixii uu arkay “23-qoys oo ka mid ah dadka xoolahoodii ay la tageen biyaha ayaa halkaan aanu ku joogna, oo ku dhib qabnaa”.
Gudoomiyaha degmada Buurtinle wuxuu idaacada ERGO ayaa sheegay in ay Maamulku ku mashquulsan yihiin sidii gargaar loola gaari lahaa dadka xoolahooda ay roobabku la tageen, iyo weliba dad kale oo ku sugan deegaanka Godob Yar oo ay biyaha roobku guryaha ka dumiyeen.
Shacabka iyo ganacsatada reer Buurtinle ayaa gelinkii dambe ee khamiistii geeyey deegaanada roobabku ka da,een qalab kala gedisan oo u badan shiraaca laga galo biyaha roobka, iyo weliba raashiin kala gedisan oo loogu talo galay dadkii cayroobay oo weli ku sugan deeganadii ay aafadu ku dhacday, Puntland iyo Hay,daha caalamiga ahna waxaa baaq u diray Maamulka deegaanka.
Sikastaba xilligan ay curteen roobabkii Guga waxaa si ay sheegeen maamulka degmada Burtinle ay sidoo kale qaadayaan tallaabooyin ay ku xaqiijinayaan si aysan halkaasi uga dhalan cuduro maadaama ay haatan jirto cabsi baaxad leh oo arrintaas la xiriirta.
Cabdiraxmaan Xaaji/MG
