Ganacsatada xoolaha iyo dulaalleyda ayaa sheegay in hoos u dhac uu ku yimid qiimaha xoolaha, iyagoo u sababeeyay arrintaas hoos u dhaca ku yimid sarrifka lacagta doollarka Mareykanka, lacagtii shilinkii Soomaaliga ahayd oo ciriiri gashay iyo shirkadaha dhoofka xoolaha iibsada oo ka kala imaan jirey Muqdisho iyo Kenya oo muddooyinka aanan lagu arags suuqyada, arrimahaasi oo isbiirsaday ayay sheegeen inay qeyb ka yihiin dhibaatooyinka taagan.
Sida ay sheegeen ganacsatada xoolaha ku iibisa sayladaha degmooyinka Baardheere, Buurdhuubo iyo Diinsoor oo ka kala tirsan gobollada Gedo iyo Bay, waxaa jirto iib xumi. Aadan Cabdi Axmed wuxuu ka mid yahay dulaalleyda ka howlgasha suuqa xoolaha Baardheere, wuxuuna ka warbixiyay qiimaha lagu kala gadanayo noocyada xoolaha, isagoo sheegay neefka Geela ee birimada ah inuu maanta marayey lacag dhan 22 milyan oo shilinka Soomaaliga ah, halka qurbacdana ay ka hooseeyaan ilaa 7 milyan oo sh. So.
Sidoo kale Maxamed Xuseen oo ka mid ah gacansatada suuqa xoolaha degmada Buurdhuubo oo ka warramay sida maanta uu yahay dhaqdhaqaaqa ganacsiga suuqa xoolaha ee degmada Buurdhuubo iyo halka ay wax marayaan ayaa sheegay geela iyo ariga in qiimahoodu uu ka hoos maray bil ka hor halkii uu taagnaa.
Deegaannada kale ee aan la xariirnay si aan wax uga ogaanno qiimaha lagu kala gato xoolaha nool ayaa waxaa ka mid ah degmada Diinsoor ee gobolka Bay, halkaasi oo uu ku yaallo suuq ballaaran oo lagu kala iibsado noocyada xoolaha nool, sida uu sheegay ganacsade Cabdulqaadir Aftooje oo ka mid ah ganacsatada xoolaha ee degmadaas.
Sabbaynta sarrifka lacagta qalaad ee gudaha Soomaaliya ayaa keenay hubanti la’aan ganacsiga ah gaar ahaan dadka xoola dhaqatada oo xoolo badan lacagtii lagu rabay markii ay ku waayeen dib ugu celiyay miyiga, iyadoo dhibaatada ugu daran ee suuq xumida ay saameynta ugu badan waxay ku yeelatay dadka reer miyig ah ee xoolahooda u safriya suuqyada ganacsiga ee magaalooyinka, si dakhliga ay ka helaan ugu daboolaan baahiyahooda gaarka ah, markay wayaanna dantu ku qasabto inay dib ugu celiyaan miyigii, awoodooddii wax iibsina ay yaraato.
Saalixi/MH/FM
