Muddooyinkii ugu dambeeyey ayaa gudaha degmada Baardheere iyo Qaar ka mid ah tuulooyinka hoos yimaadda ee uu maro webiga Jubba ayaa waxa si weyn looga dareeemamay jilaabashada Kalluunka iyo cunistiisa,taasina waxay keentay in gudaha magaalada laga furo goobo ganacsi iyo suuqyo lagu iibiyo Kalluunka.
Qaar ka mid ah kalluumaysatada ku sugan degmada Baardheere iyo ganacsatada iibisa kalluunka laga soo jillaabto hareeraha wabiga Jiinkiisa oo aan la kulannay ayaa waxay sheegeen in ay faa`iido badan ku qabaan jilaabashada Kaluunka iyo ka ganacsigiisa, yagoona sheegay kalluunka inuu waxtar weyn uu u leeyahay nolosha qofka iyo caafimaadkiisa, xilligaanna cunista Kaluunka kaalin weyn uu kaga jiro nolosha dadka deegaanka.
Maxamed Cali Shaatoole oo ka mid ah Kalluumaysatada degmada Baardheere oo la hadlayey radiyaha ERGO ayaa sheegay mudo ka badan 21 sano inu uu ku howlanaa Jillaabashada Kalluunka, noloshiisa iyo midda qoyskiisana ay ku tiirsan tahay wax soo saarka Kalluunka laga soo saaro webiga, isagoo sheegay Kalluumaysatada deegaanka in ay gaarayaan ilaa 80 ruux, wax soo saarkooduna ay u adeegsadaan xargo iyo biro yar-yar, kuwaasoo ah noocyada ay ku jilaabtaan Kalluunka.
Dhibaatooyinka kale ee ay qabaan Kalluumaysatada deegaanka ayuu sheegay in ay ugu weyn tahay qalabka lagu jillaabto Kalluunka webiyada oo noociisu aan wanaagsanayn, taasi oo mararka qaar kalluumaysatadu ay kala kulmaan khatar keenta halkii ay kalluun ka sugayeen in in yaxaas uu ugu soo dhacao maqaalinta, waxaana dhibaatooyinkaasi noo sii dheer ayuu yiri taageero iyo tababar la`aan xaga shaqada, maadaama xilligani ayan jirin cid taageero u fidisa Kalluumaysatada.
Yaxye Salax Cali oo ah Ka mid ah ganacsatada iibisa Kalluunka ayaa sheegay howsha ka faa`ideysiga Kalluunka in ay u socoto si wanaagsan, dadka deegaankuna ay si weyn ula qabsadeen cunista Kalluunka, wuxuuna sheegay in maalin kastaaba la keeno in ka badan ilaa 200 oo xabo oo noocyo kalluun ah, dabadeedna uu si tafaariiq iyo jimloba uga iibiyo Suuqyada iyo Maqaayadaha, iyagoo weliba kalluunka ay soo jillaabtaan uu kan ugu weyn yahay ilaa 6kg, kuna iibiyaan ilaa 500 kun shilin.
@
Saalixi/AM/MH
