Sida uu Cabdicasiis noo sheegay saraakiil ka tirsan CIDda ayaa telefoon u soo diray xilli uu ku guda jiray howlihiisa shaqo, iyagoo ku amray inuu yimaado xarunta CID waxayna markii uu wariyaha gaaray xarunta ay waydiiyeen suáalo dhawr ah oo la xiriiray sheeko kufsi ahayd oo uu baaritaan ku waday, iyagoo markii dembana ku amray in la xiro.
Cabdicasiis ayaa ku dooday in sheekadaas uu ku guda jiray diyaarinteeda balse uusan wali sii deynin isagoo wali doonayo inuu helo xog dheeri ah oo ku saabsan haweenayda sheegatay in la kufsaday.
Tifaftireha guud ee idaacadan Ergo Cabdulqaadir Maxamed Mursal ayaa dhambaal uu u diray saraakiisha ciidamada dawlada ee gacanta ku haya Cabdicasiis wuxuuna ka codsaday in ay dib xoriyaddiisii ugu soo celshaan saxafigan.
Cabdulqaadir Maxamed Mursal ayaa sheegay in sharciga saxaafada iyo kan madaniga ah ee dalka u dagsan uusan sheegaynin in wariye loo xiro isagoo baadi goobaya xog la xiriirta dhacdo ama sheeko.
Tifaftireha ayaa ugu dambeyntii sheegay in idaacada Ergo howlaheedu ay aasaas muhiim ah u yihiin soo tebinta iyo baaritaannada ka dhanka ah tacaddiyada sida kufsiga iyo gaboodfallada kale ee lagula kaco bulshooyinka tabarta yar.
MG/AM
