Sida ay qortay wakaaladda wararka arrimaha bini`aadannimada u qaabilsan QM ee IRIN, dhallinyaro badan ayaa ka taga gobollada Somaliland, iyagoo si sharci darro ah ugu tahriiba dalal kale, tanoo ay wacantahay shaqo la`aanta.
Goobaha ay dhallinyaradan u tahriibaan ayaa waxaa ka mid ah Liibiya, iyagoona cagta sii mariya Itoobiya iyo Suudaan, dabadeedna Liibiya uga sii tallaaba dalalka Yurub.
Saciid Cumar, oo ah agaasimaha waaxda dhallinyarada ee wasaaradda dhallinyarada iyo isboortiska Somaliland ayaa u sheegay IRIN in aan tirada saxda ah la heynin, balse lagu qiyaasayo in saddexdii bilood ee ugu dambeysay sanadkii 2011-kii, keliya 150 dhallinyaro ah ay si sharci darro ah u tahriibeen, marka loo barbar dhigo sanadkan oo saddexdii bilood ee ugu dambeysay ay 300 ilaa 350 qof ay tahriibeen.
Ilaa 150 dhallinyaro reer Somaliland ah ayaa dib halkaasi loogu soo celiyay intii u dhaxeysay bilihii Jannaayo iyo Nofembar 2011kii, ka dib markii saraakiisha Itoobiya ay ka qabteen xadka u dhaxeeya Itoobiya iyo Suudaan, 200 oo dhallinyaro ah ayaa dib loo soo celiyay 11kii bilood ee ugu horreeyay sanadkan 2012ka, sida ay sheegeen saraakiil ka tirsan waaxda socdaalka ee Somaliland oo ku sugan magaalada Tog-Wajaale, ee ku taalla xadka Itoobiya iyo Somaliland.
Shaqo la`aanta ayaa ah caqabada ugu badan ee ku qasbaysa dhallinyarada in ay haajiraan.
Sida uu sheegay Cali Cusmaan Cabdi-Liba, oo ah saynis-yahay siyaasadeed, dhallinyarada leh tacliinta sare ayaa sidoo kale u dhow inay ka tagaan Somaliland.
Cabdi-Liba oo ka mid ah aqoonyahannada ayaa ku baaqay abuuridda dugsiyo farsamo, iyadoo xirfadahaas looga baahan yahay suuqa.
“Waxaan rajeyneynaa in deeq-bixiyeyaasha caalamka ay sidoo kale ka qeyb qaataan, ilaa 50,000 oo shaqooyin ah ayaa la abuuri doonaa sanadaha soo socda si loo yareeyo xaddiga shaqo la`aan ee maraya boqolkiiba 80 lana gaarsiiyo boqolkiiba 20,” ayuu yiri Axmed.
Dowladda Somaliland ayaa lagu wadaa inay meel dhigto kharash loogu talo galay shaqaaleynta dhallinyarada, iyadoo ugu horreyn lagu kharash gareynayo $130 milyan oo doollarka Mareykanka ah, kharashkaasoo laga ururin doono gaar ka dhigidda dhismayaashii hore ee dowladda, sida uu sheegay Baashe Yuusuf Axmed, oo ah agaasimaha guud ee wasaaradda shaqada iyo arrimaha bulshada Somaliland.
