Tahriibayaal u badnaa Itoobiyaan ayaa shalay dooni kula qallibantay meel 5-meyl u jirta xeebta magaalada Boosaaso, maamul goboleedka Soomaaliyeed ee Puntland, sida ay sheegeen saraakiisha maamulka.
Tahriibayaashan oo ka baxay xeebta Lug-Samatar ee deegaanka Mareero oo ku yaalla duleedka magaalada Boosaaso, kuna sii jeeday dalka Yemen ayaa meydadkooda oo gaaraya 19 laga helay xeebta magaalada Boosaaso, waxayna 18 ka mid ah ahaayeen Itoobiyaan halka qofka kalana uu ahaa Soomaali, iyagoo isugu jiray 12 haween ah, 6 rag ah iyo ilmo yar oo 4 jir ah, waxaana meydadkooda la geeyayay isbitaalka weyn ee Bosaaso, waxaana jira 5 nin oo Soomaali ah kuwaasoo la soo badbaadiyay, sida uu raadiyo Ergo u xaqiijiyay xeer ilaaliyaha guud ee maxkamadda darajada koowaad ee gobolka Bari, Bashiir Ismaaciil Axmed (Hoobaley), oo ka mid ahaa guddi loo xil rsaaray baadi goobka raq iyo ruux tahriibayaashii la socday doonta qallibantay.
“Tahriibku waa sharci darro uu maamulku mamnuucay, dhowaan doomo lagu tahriibayay ayaa la qabtay oo la xukumay, ciddii lagu arko iyadoo dadka tahriibineysana waxaa la marsiin doonaa sharciga.” Sidaasna waxaa yiri xeer ilaaliyaha wuxuuna sheegay inaanu tiro sax ah ka hayn inta ku dhimatay doontaas maaddaama aanan la hayn dadkii ka mas`uulka ka ahaa; hase ahaatee uu socodo baaritaan.
Wasiir ku xigeenka wasaaradda caafimaadka Puntland, Saynab Ugaas Yaasiin, oo magaalada Boosaaso kula hadleysay warfidiyeennada ayaa ka digtay khatarta lagala kulmo tahriibka waxayna tiri “Tahriibka dhibaatooyin badan ayaa lagala kulmaa, waana khatar ay u bareeraan kuwa wax tahriibiya iyo kuwa tahriiba intaba, waxaana ugu baaqi lahaa inaysan naftooda halligin oo aysan tahriibin.”
Dhowaan sharci ay meel mariyeen baarlamaanka Puntland ayaa mamnuucay in aan laga tahriibi Karin xeebaha Puntland, balse taasi ma noqon mid sidii la rabay u meel marta.
Tahriibayaasha ayaa intooda badan aada dalka Yemen, iyagoo doonaya markaas iney uga sii gudbaan dalal kale sida Sacuudiga oo ay aaminsan yihiin iney ka heli karaan nolol dhaanta midda ay ka yimaaddeen oo ay dhibta iyo dhimashada u soo maraan. Inta badan dadkan ayaa dib looga soo celshaa markii ay cagaha saaraan dhulka Sacuudiga, iyagoo aan haba yaraatee gaarin wixii ay ka filayeen.
Axmed Soomaali/FM/AM
