Wasaaradda arrimaha gudaha maamulka Puntland oo gacan ka heleysa hay`adda qaxootiga QM ee UNHCR, ayaa soo bandhigtay hab lagu maamuli doono barakacayaasha ku nool gobollada Puntalnd, taasoo ay hore u ansixiyeen mudanayaasha baarlamaanka Puntland.
“Waa hab lagu kala hagayo barakacayaasha iyo hay`adaha samafalka, waxaana lagu dhowrayaa xuquuqda barakacayaasha iyo tan iyaga lagu leeyahay.” Waxaa sidaa yiri wasiir ku xigeenka wasaaradda arrimaha gudaha Puntland, Cali Yuusuf Xoosh.
kulan ay kasoo qeyb galeen barakacayaasha, dadka deegaanka, mas`uuliyiinta maamulka Puntland iyo hay`adaha samafalka ayaa lagu qabtay magaalada Boosaaso, waxaana lagu sheegay in barakacayaasha maanta kadib lagu hagi doono nidaamkan.
Habkan lagu maamulayo barakacayaasha ku nool deegaannada Puntland ayaa haddii ay hirgesho waxay wax weyn ka beddeli doontaa nolosha dadka barakacayaasha oo indhawaaleba ka cabanayey dhibaatooyin kala duwan oo aan waxba laga qaban, iyadoo siyaasaddana ay qeexeyso waajibaadka barakacayaasha, dadka deegaanka, dowladda iyo kan hay`adaha samafalka ka saaran dadka barakacayaasha.
Magaala-xeebeedka Boosaaso waxaa ku nool barakayaal lagu qiyaaso 60,000, kuwaasoo kasoo cararay gobollada kala duwan ee dalka, intii ay socdeen dagaalladii sokeeye, barakacayaashan ayaa isugu jira xoogsato iyo xirfadley, waxayna deggan yihiin bariga iyo waqooyiga magaalada.
Xerooyinka ugu weyn ee ay ku nool yihiin dadkan barakacayaasha ayaa lagu magacaabaa Bariga Boosaaso, waxayna ka kooban yihiin xerooyinkan toban xero oo la isu geeyey, waxaana ku nool dad gaaraya 45,000, halka kaamamka kale ee ku yaalla waqooyiga magaaladana ay ku nool yihiin dad gaaraya 15,000.
Axmed Soomaali/FM/AM
