Waxaa maanta deggan xaaladda xaafadda Soomaalidu ay ku badan tahay ee Islii magaalada Nairobi, oo labadii maalmood ee ugu dambeysay ay xiisad ka taagneyd.
Inkastoo wali goobaha qaar ee ganacsigu ay wali xiran yihiin, ciidanka loo yaqaanno GSU ee dalka Kenya, ayaa sugaya ammaanka, waxaana socda shir looga arrinsanayo xaaladda xaafadda, oo ay yeelanayaan laanta amniga gudaha ee Kenya iyo odayaasha Soomaalida ee xaafadda Islii, waxaana maanta dib ugu soo laabanaya xaafadahoodii qoysas hore uga barakacay.
Mudane Yuusuf Xasan, oo ah mudanaha laga soo doortay degmada Kamakunji oo xaafadda Islii ay ka tirsantahay ayaa rabshadahan ku tilmaamay kuwo la doonayo in lagu boobo hantida Soomaalidu ku leeyihiin xaafadda, isagoo ka digay in wixii dhacaba aan dusha loo saarin bulshada Soomaaliyeed ee dalka ku nool, isla markaana ku eedeeyay ciidamada ammaanka Kenya inay dayaceen wax ka qabashada amni darrada ka jirta xaafadda.
Dhanka kale, dowladda Kenya ayaa uga digtay shacabkeeda inaysan bartilmaameedsan bulsho aan waxba galabsan “Kuma eedeyn kartid dadka waxaysan galabsan, waa khalad sababtoo ah waa dembiilayaal waxa geystay qaraxa, ee ma aha qowmiyad.” Sidaa waxaa yiri madaxa booliiska magaalada Nairobi, Moses Ombati.
Xiisaddan oo lagu bartilmaameedsanayay dadka Soomaalida ah ee xaafadda u badan, ayaa ka billaabatay qarax gelinkii dambe axaddii lala beegsaday gaari kuwa dadweynaha ah, qaraxaasoo ay ku dhinteen ilaa 6 qof, halka 18 kalana dhaawaca kasoo gaaray loola cararay isbitaalka Kenyatta. Welina ced loo soo qabtay inay ka dambeyso qaraxaasi ilaa haatan ma jirto.
AA/FM/AM
