Inta la xaqiijiyay illaa dhawr iyo toban ruux oo saddex ka mid ah aya ahaayeen saxafiyiin ka hawl gali jiray warbaahinta magaalada Muqdisho ayaa ku geeriyooday qaraxyo loo maleynayo is miidamin kuwaasoo ka dhacay goob maqaayad ah oo ku taala agagaarka guriga hooyooyinka ee magaalada caasimadda ah ee Muqdisho.
Suxufiyiinta ku geeriyootay goobta ayaa waxaa ka mid ahaa Allaha u naxariistee wariye Cabdi sataar Daahir Sabriye Madaxii barnaamijyada Telefishinka Qaranka, C/raxmaan Yaasiin oo ahaa Agaasimahii VOD Radio Xamar, Liibaan Cali Nuur oo ahaa madaxii wararka ee Telefishinka Qaranka, sidoo kale waxaa goobta ku dhaawacmay weriyeyaal ay ka mid yihiin Xuseeen Salamaan oo ka tirsan idacaadda Radio Muqdisho, Cabdullaahi Suldaan, Cabdirasaaq Shiine iyo Burhaan oo iyaguna ka mid ah saxafiyiinta Raadiyo kulmiye.
Dadka meesha ku dhintay ayaa la sheegay inay kor u dhaafayaan illaa 20 ruux dhaawacana waxaa la sheegay inuu ku dhawyahay illaa kontomeeyo, kuwaasoo isugu jiray saxafiyiin iyo dad kale oo ku sugnaa meesha, markiiba waxaa goobta mashaqada ka dhacday soo gaaray gawaarida gurmadka ee loo yaqaano Ambalaas iyo ciidamo ka tirsan ammaanka kuwaasoo isku gadaamay goobta.
Cabdullaahi Suldaan oo ka tirsan weriyeyaasha ku dhaawacmay qaraxa oo la hadlayay idaacadda Ergo isagoo ku sugan isbitaalka Daaru-Shifaa halkaasoo lagu daweynayo, ayaa sheegay in indhihiisa uu ku arkay meydadka weriyeyaasha isagoo sheegay inay meel wada fadhiyeen, Cabdullaahi Suldaan ayaa sheegay in hadda isagu xaaladdiisu ay wanaagsan tahay lugta midigna uu ka jabay haddana la daweynayo.
Si kastaba ha ahaatee waxaa qaraxyadaasi cambaareeyay wakiilka gaarka ah ee xoghayaha guud ee QM u qaabilsan arrimaha Soomaaliya, danjire Augustine P. Mahiga ayaa cambaareeyay weerarradii shalay lagu qaaday maqaayadda The village restaurant ee magaalada Muqdisho. Dad badan ayaa qaraxaasi ku dhintay ayna ka mid yihiin saxafiyiin Soomaaliyeed.
“Waxaan si xooggan u cambaareynayaa weerarkaasi naxariis darrada ah. Ficilladaasi argagixisada ah ma carqaladeyn karaan guulihii dhowaan ay Soomaaliya gaartay” Ayuu yiri Mahiga. “Dhacdooyinkan oo kale waxay keliya sii xoojinayaan sida ay dadka Soomaalida ah uga go`antahay inay iska diidaan qalalaasaha ayna la qabsadaan xalka nabadeed ee dagaallada.”
Wuxuu danjiruhu ugu baaqay dadkii ka dambeeyay qaraxyadaasi inay ka waantoobaan ficilladaas waxyeellada u geysanaya dad aan waxba galabsan.
“Weerarka wuxuu yimid xilli dadku ay aad ula dhacsan yihiin horumarka ay Soomaaliya dhowaan ku tallaabsatay, waana wax kasoo horjeeda rajada Soomaalida in weerarro iyo carqalado ay Soomaaliya dib ugu soo laabtaan,” ayuu hadalkiisa sii raaciyay Mr. Mahiga.
Danjire Mahiga ayaa tacsi tiiraanyo leh u diray qoysaskii ay ka geeriyoodeen dadkii qaraxa shalay ku dhintay, wuxuuna u rajeeyay kuwa dhaawacmay inay si deg deg ah usoo kabtaan.
“Xafiiska QM u qaabilsan siyaasadda Soomaaliya, UNPOS waxay taageereysaa dadka Soomaalida ah, waxaan aka go`an inay si dhow ula shaqeyso xukuumadda cusub si Soomaaliya loogu garab istaago waddada nabadda ee ay cagta saartay. Ayuu hadalkiisa raaciyay Danjiraha xoghayaha guud ee QM u qaabilsan arrimaha Soomaaliya.
Dhanka kale, saakay ayaa magaalada Muqdisho ay kooxo hubeysan ku toogteen wariye Xasan Yuusuf Absuge oo allaha u naxariistee ka tirsanaa Radio Maanta oo xaruntiisu tahay magaalada Muqdisho. Dilka wariye Absuge ayaa ka dhigaya afar, tirsada weriyeyaasha laba beri gudahood lagu dilay magaalada Muqdisho.
AA/FM/YK
