Beeralleeyda ay awooddooda dhaqaale hooseyso ee beerta dhul-beereedka ku yaalla daafaha magaalada Beledweyne ee xarunta gobolka Hiiraan, ayaa tan iyo intii la gudo galay xilliga Jiilaalaka waxay si isdaba joog ah uga cabanayeen xoolo ka daaqa beeraha xilliyada habeenkii.
Beeralleydan oo ah kuwo aad sabool u ah, isla markaana labada xilli-roobeed ee sanadka beerta dalagyada quud-beerasho ee ay ku daboolaan baahidooda guriga ayaa toddobaadkan si isku mid ah uga sheegtay xoolo u dhacaya sarsarka beerahooda.
“Beertii annaga oo maalinkii oo idil joogno kana shaqeeyneyno ayaa balkii marka aan isdhahno waa idiin nacfigalay ee iibsada ayaa waxaa habeenkii u soo dhacaya geel soo lumay ama ku talagalkiisu yahay in beeraha lagu daayo si beeraha uu u daaqo, haddii aan dhageysan lahaynna shanqartiisa ayaa laga furay koorta si aan loo dhageeysan oo loogu toosin beertiina uu ku mirto habeenkii oo idil ,waaga markuu baryana aad ku kacdo geelii oo dhax fadhiya oo ka dhargay beertiina ay waxba ku harin, cabashadeeydu waa sidaa.” Ayuu yiri mid kamid ah beeralleydaasi, oo ay ka muuqatay tabardarri, oo xilli aroor ah soo dul joogsaday beertiisa oo geel aanay cidi wehlin barbar ka daaqay, xilli habeen ah oo uu ka maqnaa.
Xilligan ayaa ah mid jiilaal ah oo xoolalleydu ay aad ugu mashquulsan yihiin xoolahooda. Baryare Xasan, oo ah mas`uulka qoys ballaaran oo reer guuraa ah isla makaana leh Ari, Lo’ iyo Geelba oo ku nool dhul aan uga durugsaneyn dhul-beereedka laga cabanayo ayaa isagoo ku mashquulsan xoolihiisa xilli galab ah ugu warceliyey idaacadda Ergo sidan “Xoolaheyga waa kuwan Ilaaheey kasakoow anaa leh, buurahaas abaarta ah ayay iigu foofaan Alxamddu –lillaahi, habeenkii markay iisoo hoydaan mararka qaar bal aan usoo gaday ayaan u dhigtaa bani’aadam inaan dhibo uguma tala gelin, carruurta ayaa ii raacdo aniguna kama fariisto oo waan raacaa mar mar waa iga lumaan oo bani’aadam ayaan nahay , marka dadku qof walba wuxuu leeyahay isagaa ka mas`uul ah, anigu shakhsi ahaan inaysan xoolaheygu dadka dhibin ayaan jeclahay oo aan aad uga xafido.”
Sanad waliba marka lagudo galo bilaha jiilaalka ee daaqsinka xoolaad uu gabaabsiga noqdo kuleyl badanna uu jiro, waa xilliga reer guuraaga qaarkiis ay u yaqaannaan “Kaldambeedkee” ayaa waxaa soo baxa cabashada beeralleydan saboolka ah ay ka cabanayaan xoolaha u dhaca beerahooda xilliyada habeenkii, hase ahaatee marka da`mada roobku billaabato waxaa yaraada cabashada beeralleydaas oo waxay helaan nafis ay kaga nastaan ilaalmada xoolihii beerahooda u dhacayey, waxaana taa ugu wacan baa la leeyahay reer guuraaga xoolahani soo soofsaday ayaa u guura meelaha uu roobku ka da`o ee gobolka.
Cabdullaahi Salaad/FM
