Kalluumaysatada ka jillaabata xeebaha koonfureed ee Soomaaliya ayaa ka cabanaya dhibaatooyin ay ku hayaan siday sheegeen maraakiibta shisheeye ee ku sugan xeebaha Soomaaliya iyo ciidamada la dagaallanka burcad-badeedda, kalluumaysatadaan ayaa sheegtay in maraakiibtaasi ay ka jarjaraan shabaagaha ay ku dabtaan kalluunka, iyagoo sheegay in doonyihii yaryaraa ay ku jillaaban jireen kalluunka ay kala baxeen badda kadib markii ay u adkaysan waayeen dhibaatooyinkaasi.
Madoobe Aw-jaamac wuxuu ka mid yahay milkiilayaasha doomaha yar yar ee ka jillaabta xeebaha Soomaaliya , wuxuu Raadiyo Ergo u sheegay in maraakiib waa weyn oo ku sugan biyaha Soomaaliya ay ku qasbeen in gabi ahaanba ay joojiyaan howlihii jillaabasho ay badda ka hayeen, taasoo ay ugu wacan tahay in la duqeynayo xilli ay ku jiraan badda sida ka dhacday ayuu yiri xeebta magaalada Kismaayo.
“Waxay gurtaan kalluunkeenna, iyagoo waliba isticmaalaya xoog, Kismaayo waxay ku duqeeyeen doonyo badan oo ay lahaayeen kalluumeysato Soomaaliyeed iyagoo doomo badan dejiyay, waxay kaloo laayeen kalluumaysato Soomaaliyeed oo aan anigaba magacyadooda idiin sheegi karo,” ayuu yiri Madoobe Aw-jaamac.
Madoobe ayaa intaasi ku daray in dabar go` iyo xaaluf ba`an lagu hayo kalluunka ku jira xeebaha Soomaaliya, kuwaasoo uu sheegay inay xaalufinayaan isla mar ahaantaana ay guranayaan dad shisheeye ah, “Waxaa lagu marmarsoonayaa waxaan la dagaallamaynaa burcad-badeed, laakiin xaqiiqdu sidaas maahan ee waxay guranayaan oo ay jillaabanayaan kalluunkeenna,” ayuu intaa raaciyay yiri Madoobe oo sheegay in Kenya ay u soo diraty Xeebaha rag siimaano ah kuwaasoo guranaya noocyada kala duwan ee kheyraadka xeebaha Soomaaliya, sida uu sheegay.
Madoobe ayaa sheegay in laba xilli ay ugu wanaagsan tahay jillaabshada badda xilliga guga iyo kan dayrta, hase yeeshee labadaas xilliba haatan jillaabasho aysan jirin, isagoo sheegay in la nabaad guuriyay noocyo badan oo kalluun ah sida Aargoosatada, kalluunka loo yaqaanno King fishka, sidoo kale la guranayo ugxanta nooca kalluunka ee loo yaqaanno Taraaqadda.
Kalluumeysato badan ayaa waxay noloshoodu ku tiirsantahay kheyraadka badda, iyagoo ku dabbara nolosha qoysaskooda.
Cabdulqaadir Maxamed Cabdulle/AA/FM
