Qodashada dalagyada kala duwan ee beeraha waa mid kamid ah waxyaabaha lafdhabarka u ah wax soo saarka iyo horumarka dadka iyo dalkaba, waana hawl adag oo u baahan karti iyo adkeysi dheeri ah.
Qodashada beeraha kuma koobna kaliya ragga ee waxaa dhinaca kale oo howshaasi ka qeyb qaata kana shaqeeya haweenka, oo iyaguna door muuqda kaga jira qodashada beeraha iyo wax soo saarka.
Hawlaha ay ka qabtaan haweenku beeraha waxaa kamid ah iyagoo ka qeyb qaata marka la falayo ama la geed qaadayo, beeristeeda ama abuurkeeda oo ay kaalin mug leh ka cayaaraan, sidoo kale haweenku waxay ka qeyb qaataan xilliga ay soo go`aan beeraha oo ay qabtaan shaqooyin aad u adag.
“Muddo aad u dheer ayaan ahay beeralley, carruurteyda waxaan ku soo korsaday hawlaha beeraha oo aan in muddo ahba ka shaqeynayay, waxaan leeyahay dhul ballaaran kaasoo aan ku abuurto noocyada kala duwan ee dalagga beeraha,” sidaana waxaa Ergo u sheegtay Xaawo casir oo iyadu ah haweeney beeralley ah oo ku nool agagaarka degmada Afgooye ee gobolka Shabeellaha Hoose, waxayna intaasi ku dartay in hawshaan beeraha ay ku soo dhex jirtay muddo gaaraysa 30 sanadood.
Hawlaheenna ,beerashada dalagyada waxaa ku timid dib u dhac aad u weyn taasoo ay ugu wacan tahay colaadaha ka jira dalkeenna, ayay tiri Xaawa oo sheegtay in dhinaca kale jiilaalka dheeraaday uu sabab u yahay hoos u dhaca ku yimid wax soo saarkii miraha ka soo go`i jiray beeraha.
“Haddii aan ka hadlo kaalinteenna ku aaddan wax soo saarka beeraha waxaan qabannaa shaqooyin kala duwan oo badan, aniga hadda cayayaanka ayaan ka buufiyaa beeraha,waxaa jira bahallo khatar ah oo dilaya beeraha,” sidaana waxaa idaacadda Ergo u sheegtay haweeney lagu magacaabo Boolaay Xaashi oo iyadu ka mid ah haweenka ka shaqeeya beeraha gobolka Hiiraan,
“Ninka beerta ayuu galaayaa asagaa shaqeynaya, anagana waxaa u karinaa cuntada wixii aas rabana waan u raadinaa” ayay tiri Boolaay oo sheegtay in shaqadeeda aanay ku koobnayn oo kaliya buufinta beeraha .
Dumarka hawla kala duwan ayay ka qabtaan beeraha, waxaana ka mid ah mararka qaar iyagoo hees hawleed ay ku dhiiri gallinayaan ragga ku hawlan beeraha u mariya,si aanay u daalin.
“ Waxaan dhahnaa xiliga jiilaalka ee shaqada ay socoto qurunba yaanbadaa qaara geehaayee.qaadan weyday adaa khoofi doontidee, ayay tiri Xaawa casir. “Markii beerta ay fiicantahay waxaan dhahnaa, soo baxaan iriyee waa bukaa itiriyee ciddi kuu yeeree waa ordeysaa”
Xaawa casir oo sii hadlaysay ayaa sheegtay “Markii dalaggu soo go`ana waxaan dhahnaa, ma caddee ha caddaado, caano geel ha u ekaado.”
Waxa jira dhibaatooyin badan oo mararka qaar halis geliyo caafimaadka haweenka ku dhex jira beerashada, Xakiimo Cali oo iyadu beeralleyda gobolka Shabeellaha Hoose ka tirsan ayaa tiri
“Haweentu iyadoo uurrey ah ayay shaqeyneysaa roob baa ku da`aya, waxaa laga yaabaa inay ilmaha kasoo hallaabaan, haddana waxay dareemeysaa xanuun badan sida dhabarka, lafaha iyo meelo kale, xitaa dumarka qaar iyagoo umusha ku jira ayay shaqeeyaan.” Ayay ku soo gabagabeysay Xakiimo Cali.
Si kastaba ha ahaatee, haweenka Soomaaliyeed ee ku nool gudaha dalka ayaa iyagu hawlo baaxad leh ka qabta beeraha, isla mar ahaantaana door muuqda ku leh wax soo saarka dalka.
Yusuf Keynaan/MG/CC/FM
