Maamulka deegaanka Karin ee gobolka Bari ayaa ka warbixiyay dab qabsaday dhul beereed baaxad leh oo ku yaalla degaankaasi, isagoo sheegay in dabkaasi uu baabi`iyay beero ay ka baxayeen dalagyo kala duwan sida liin, timir iyo noocyo kala duwan oo dalagyo ah.
Guddoomiyaha deegaanka Karin ee gobolka Bari, Axmed Cabdi Goombe oo la hadlayay Raadiyo Ergo ayaa sheegay in dabkaasi uu baabi`iyay beero qiyaastii ka badan illaa 400 oo beero, waxaana uu sheegay in dabkaasi uu kacay xilli duhur ah.
“ Waxaa noo soo gurmaday maamulka degmada Boosaaso, waxayna noo keeneen dabdamis iyo booyadaha biyaha si dab ka loogu bakhtiiyo, Alle mahaddii hadda dabku intii waa ka yar yahay.” Ayuu yiri Axmad Cabdi Goombe, guddoomiyaha degmada Karin ee gobolka Bari, oo sheegay in wax dhaawac ama dhimasho nafeed ah aanu geysannin dabkaasi.
Dadka deegaanka Karin ee gobolka Bari ayaa waxay u badan yihiin dad beeralley ah, kuwaasoo noloshoodu inta badan ay ku tiirsantahay qodashada beeraha.
Maxamed Cabdullaahi Kooshin/AA/FM
