06 June, 2012 MUDUG
Inkasta oo ay da`een roobabkii guga islamarkaasina gobollada qaar ay ka soo doogsadeen abaarihii ku dhuftay dadka iyo duunyada, ayaa haddana waxaa jira deegaanno lagu diimay dhibic roobaadkii laba xilli oo is xigtay islamarkaana aysan ka di`in roobabku.
Deegaanka Ceelhuur wuxuu ka mid yahay deegaannada gobolka Mudug islamarkaana hoos taga Degmada Xarardheere ee gobolkaas, waxayna dhanka bari kaga beegan tahay Magaalada Cadaado qiyaastii 270 KM. Dadka deegaankaas oo ay la xiriirtay idaacadda Ergo ayaa sheegay in dhibaatooyin badan oo bini`aadannimo oo ay ugu weyn tahay biyo la`aan iyo in aanay jirin xarumo si ku meel gaar ah u sii qaban karaya howlaha caafimaadka ee ay u baahan yihiin dadka deggan deegaankaas.
Shire Cali Xalane wuxuu ka mid yahay maamulka deegaankaasi wuxuuna Raadiyo Ergo u sheegay inay ka jiraan xilligani biyo la`aan baahsan oo saameeysay dhammaan qoysaskii danyarta ahaa iyo kuwii kale ee ku dhaqnaa deegaanka Ceelhuur.
Shire ayaa intaa ku daray in ceelka kaliya ee ku yiillay deegaanaka Ceelhuur uu biyo keeni jiray markii togogga dhaadheer ay xilli roobaadka biyo soo rogaan.
Shire Cali Xalane ayaa Raadiyo Ergo u xaqiijiyay meesha ugu dhow ee uu roob ka da`ay inay u jirto deegaankaas illaa iyo 50 KM, iyo in ka badan taasi oo sababtay in dadka xoolo dhaqatada ah inta uga badbaaday abaarihii dhowaan ku dhuftay Soomaaliya ay daaqsin ula raadsadaan goobaha ay roobabka ka da`een.
Ugu dambeyn ayuu ka warbixiyay Shire Cali Xalane illaa 40 qoys in biyo la`aan darteed ay uga barakaceen deegaanka Ceelhuur islamarkaana ay jiraan qoysas kale oo ku dhibaataysan.
Dadka deggan deegaanka Ceelhuur ayaa haatan waxay ku tiirsan yihiin biyo loogu keeno gawaarida booyadaha, oo si dhib leh ku soo mara bacaadka xiray waddooyinka qaarkood, oo aysan u suurta galeynin in gawaarida qaar ay maraan.
Cumar Xabeeb Nuur /MG/FM
