12 June, 2012 GEDO Boqollaal qoys oo ka soo barakacay qeybo ka mid ah gobollada koonfur-galbeed dalka ayaa dhibaatooyin ay ku haystaan qaybo ka tirsan gobolka Gedo, dadkaan oo ku sii jeeda xeryo qaxooti oo ku yaalla deegaanka Doolow Itoobiya, siduu Raadiyo Ergo u sheegay Daahir Cabdiraxmaan cabdi oo ka tirsan hay`ad gargaar oo la yiraahdo ASEP “Dadkan waa dad soo lugeeyay oo aan waxba wadan, Bakool iyo Bay ayay ka yimaadeen badankood, aad bey u rafaadsan yihiin mana wataan raashiin iyo biyo, qaar waxaa soo dhoweeya oo halkaan keen baabuurta ciidamada, annaga waxaan u sameynay meelo ay qorraxda ka harsadaan, musqulo iyo meelo ay biyo ka heli karaan. “
Daahir ayaa sheegay in dadkaan soo qaxay ay isugu jiraan dad ku hakada gobolka Gedo, kuwaasoo qiyaastii uu sheegay in boqol qoys ay bishiiba soo galaan gobolka, halka ay jiraan kuwo kale oo aan tirakoobneyn kuwaasoo usii gudba xadka Itoobiya iyo Kenya.
Cabdi Cali daahir oo ka mid ah guddiga dadka barakacayaasha ah ay leeyihiin oo ku jira xero ku yaalla degmada Luuq oo la hadlayey idaacadda Ergo, ayaa sheegay in dhowrkii bilood ee u dambeeyey xaalado adag oo dhinaca nolosha ah ay la soo daristay dad ka badan illaa kun qoys oo ku jira illaa 13 kaam oo ku yaalla gudaha iyo daafaha Magaalada Luuq, inkastoo ay jireen mucaawinooyin la gaarsiiyay haddana sida uu sheegay Cabdi Cali in kaalmooyinkaas aysan ku filnaanin.
Mohamed Garane/FM
