Degaanada loo barakacay ee u dhexeeya degmada Afgooye iyo magaalada Muqdisho ayaa u muuqda lix sana kaddib kuwa dadku ay badi banneynayaan,inta badan qoysaska halkaasi ku noolaa oo u badnaa dad markoodii hore ka soo barakacay colaadaha ka oogan Muqdisho ayaa ku laabanaya guryahoodii ku yaalay gudaha magaalada Muqdisho.
Wariye Yuusuf Kaynaan oo ka tirsan idaacadda Ergo oo hawla shaqo ku tagay degaanada u dhexeeya degmada afgooye iyo magaalada Muqdisho ayaa sheegay in badi degaandii uu tagay ay dadku isaga barakaceen kuwaasoo uu sheegay in ay ku laabteen Muqdisho, waxaana uu yiri:-
“Marki ugu horreysay waxaan tagnay aniga iyo koox wariyaal ah oo ka ambabaxday Muqdisho,halka loo yaqaano tabeelaha Sh.Ibraahim ,kaasoo wax u jira Muqdisho, waxaan kaga sii gudubnay degaanka Garasbaalleey halkaasoo ay ku sugnaayeen qoysas badan oo kamid ahaa dadkii ka qaxay dagaaladii Muqdisho, waxaanay isu diyaarinayeen in ay ku laabtaan magaalada Muqdisho,degaanka Km13 ee loo yaqaano tareedishe ayaan misana tagnay,waxaan ku aragnay gurya iska ballaqan oo aan xirnayn dadkii ku noolaana ay ka maqan yihiin,waan ka sii gudubnay waxaan gaarnay deegaanka loo yaqaano Siinka dheer halkaasoo aan ku aragnay gurya ay dadku isaga tageen, oo haawanaya , wax yar kaddibna waxaan tagnay degaanka Ceelasha biyaha oo ah halka ugu camiran ee ay degganaayeen dadka barakacayaashu, waxaa ka muuqanaya dhismayaal cusub oo aad u qurxoon waxuu leeyahay degaanku suuq lagu iibiyo qeybaha kala duwan ee badeecooyinka, dharka,qalabka dhismaha ,electronic iwm.
Xilligaa ma jirin wax ganacsi ah oo ka jiray degaanka haba yaraatee, waxaa degaanku uu ahaa mid inta badan ay dadku isaga barakaceen, waan ka sii gudubnay haddana waxaan gaarnay degaanka lagu magacaabo Calamada halkaasoo lagu xusuusto maamulkii Alshabaab, degaankaas waxaa joogay ciidamo kaliya waxay indhahaagu qabanayeen gawaarida dagaalka iyo ciidamo aad u tira badan, kaddibna waxaan gaarnay degaano ay ka mid yihiin Lafoole Xaawa cabdi,iyo Carbis, dad yar ayaa ku harsanaa dhammaan degaanadaasi kuwaasoo ay ii suura gashay inaan wax ka weydiiyo rajada ay ka qabaan nolosha degaanada ay ku sugan yihiin maaddaama ganacsi aanu ka jirin goobahaasi, waxay ii sheegeen in maalmaha soo aaddan ay dhawrayaan in dadku dib ugu soo laabtaan degaanadooda haddii ay soo laaban waayaana ay iyaguna ka tashanayaan meeshii ay aadi lahaayeen ayuu yiri Yuusuf Kaynaan.
Yuusuf Kaynaan ayaa intaasi kudaray in marki ay tageen degmada Afgooye halkaasoo ay ku arkeen dadweyne aad u fara badan waxaana uu sheegay in degmada badi dadkii degganaa ay joogaan marka laga reebo dad iyagu aaday dhinaca Marka,waxaa kaloo uu sheegay in dhulku uu ahaa mid cagaaran , wabigu waa biyaysnaa degmadu waxa ay u muuqatay mid barwaaqeysan.
Ugu dambayntii Kaynaan ayaa sheegay in dadka degaanku ay u muuqdeen kuwa aad uga taxaddaraya isbadalka kediska ah ee ka dhacay degmadooda , mana jecleyn ayuu yiri in ay ka hadlaan xaaladda ay gashay degmada,waxaana ay u muuqdeen dadku kuwa aad u feejigan
Degmada Afgooye oo ay haatan ku sugan yihiin ciidamada Dkmg Soomaaliya iyo xoogagga AMISOM ayaa lagu soo warrmayaa in ammaankeeda aad loo adkeeyay iyadoona la sheegayo in ciidamada laga saarayo gudaha magaalada si loo geeyo hareeraha maaddaama dadku ay cabsi badan ka muujinayaan ciidamada dhex wareegay gudaha magaalada.
Kaynaan/AA/MH
