Hilibka, raashiinka iyo shidaalka oo kor u kacay, iyo sarrifka qiimaha shilnka Soomaaliga oo hoos u dhacay ayaa bilihii ugu dambeeyay saameyn weyn ku yeeshay dadka ku nool magaalada Laascaanood ee gobolka Sool.
Sicir bararkan ayaa wuxuu saamayn ku yeeshay qiimaha hilibka ee gudaha magaalada Laascaanood lagu kala iibsado oo maraya qiimo aad u sarreeya, gaar ahaan qoysaska danyarta ah ayaan heli karin qiimahan qaaliga ah ee hilibka lagu gadayo. dhanka kale dadka ka ganacsada hilibka ayaa waxay walaac badan ka muujiyeen qiimaha sii kordhaya ee hilibka .
Qaar ka tirsan haweenka ka ganacasada hilibka ayaa waxay raadiyo ERGO u sheegeen, in qiimahan uu yahay mid dhibaato wayn ku haya dadka hilibka qala oo iyaga laga siiyo qiimo qaali ah oo aanay neefka xoolaha ah ka heleynin wax faa’iido ah.
Waxay haweenkan intaa raaciyeen, in marka hilibku uu qaali noqdo aysan heleynin ced ka iibsata sidaasina ay khasaaro ku soo gaarto, oo qaarkoodna lacag dheeri ah lagu yeesho.
Waxaa jira qaar ka tirsan haweenka oo iyagu iska daayay inay ka ganacasadaan hilibka, markii qiimaha laga siiyay iyo kan ay siinayaan khasaare ballaaran uu ka soo gaadhay.
Si kastaba ha ahaatee xaaladdan dhanka nolosha ah ayaa waxay tahay mid culays wayn ku soo kordhinaysa dadka ku dhaqan gobolka Sool, waxa iyana culayska sii kordhiyay hoos u dhaca shilin Soomaaliga oo keenay in qiimaha raashiinka uu noqdo mid aanay gadan karin dadka danyarta ah ee ku nool magaalad Laascaanood.
