Barakacayaal ka soo hayaamay deegaanka Taabto ee gobolka Jubbada Hoose iyo deegaannada ku dhow dhow, ayaa gaaray degmada Dhoobley ee ku taalla xadka ay wadaagaan Somalia iyo Kenya.
Deegaannada Jaldeyse iyo Taabto oo ay ka dhaceen dagaallo xooggan oo dhex maray ciidamada dowladda KMG ah iyo kooxda Alshabaab, ayaa ah deegaannada dadka ugu badan ay ka barakaceen.
Cabdi Aadan Khaliif, oo ka mid ah dadka deegaanka Taabto ayaa Raadiyaha ERGO u sheegay isagoo jooga degmada Dhoobley in isaga iyo qoyskiisa ay kala go’doomeen ka dib markii dagaalku uu bilowday isagoo maqan.
“Markii aan waabarigii ka soo tegay Taabto, ayuu billowday dagaal xoog leh oo dadkii degganaa deegaanka ku kallifay inay barakacaan aniga iyo qoyskeygana waan kala go’nay mana garanayo meel ay ku sugan yihiin” ayuu yiri Cabdi.
Cabdi Aadan ayaa intaa raaciyay, in barakacayaasha qaarkood aysan heysan gaadiid ay ku gaaraan degmada Dhoobley oo ay soo lugeeyeen, halka kuwo kalana ay u barakaceen deegaannada kale ee gobolka.
Qaar ka mid ah barakacayaasha, ayaa doonaya inay ku biiraan qaxootiga Soomaaliyeed ee ku jira xeryaha buux dhaafay ee deegaanka Dhadhaab Kenya.
Khadar/FM
