(ERGO) – Qoyska Bile Yuusuf Nuur oo ka mid ah in ka badan 200 oo qoys oo ku nool dagmooyinka Qandala iyo Baargaal oo ka tirsan gobolka Bari ayaa wajahaya xaalad dhinaca nolosha ah. Waxaa istaagay ganacsigii Maydiga iyo Beenyada oo ay ku tiirsanaayeen afar bil ka hor, xabagtan oo loo dhoofin jiray dalalka Sucuudiga iyo Imaaraadka ayaa ganacsatadii iibsan jirtay ay diideen in ay qaataan, markii uu saamayn dhaqaale uu ku yeeshay xanuunka Karoonaha.
Dhaqaale xumada haysa qoyska Bile waxay sababtay in ay kala irdhoobaan qoyskiisa oo toban qof ah. Toddobo carruurtiisa ah ayuu ku daray labo qoysas ehelkiisa ah oo daggan tuulada Gumax iyo miyiga hoostaga, ninkan oo barakac ku tagay Baargaal horraantii bishii May wuxuu billaabay in saxiimad yar uu la raaco koox kaluumaysta ah oo uu ka codsaday in nolol-maalmeedka uu la soo dhacsado.
“Intii danbe oo sanadkan ahayd waxaan ka shaqaynaynaa oo aan aadnaa badda saxiimadaha dadku leeyihiin ayaan shaqo tag u raacaa, nolosha ugu badan maalinta la fiican yahay waxaan helnaa $3 maalmaha qaarna lama helo.”
Ka hor saamaynta dhaqaale xumo Bile sanadkii labo jeer ayuu goosan jiray xabagta isaga oo suuq-gayn jiray bisha Oktoobar. Wuxuu ka heli jiray $3000 isagoo ku dabari jiray daymaha uu qaato iyo waxbarashada carruurtiisa. Hadda afar ka tirsan ayaa dhaqaale xumada uga haray iskuulka hoose iyo dhexe ee Gumbax.
“Sanadkaa qofka Xijiga haystaa $3000 marka uu helo $1000 ama $1,500 ayaa u harta. Wuxuu doono ayuu ku qabsan jiray waxbarashada ayuu iskaga bixin jiray nacfi ayuu heli jiray, hadda waa ku qabsataye ha is-qalloocin waxaan ku jirnaa nafta yaysan kaa bixin maanta.”
Wuxuu tilmaamay in sababaha uu u joojiyay soo saaridda Maydiga iyo Beenyada in ay tahay lacag looga yeeshay labo geed oo uu xabagta ka guranayay islamar kaana ugu kiraysnaa $250 oo sanadle ah, waxaa iskaleh qoys ka shaqeeya xannaanaynta geedahan iyo sarciddooda oo ah in xiliga roobka loo diyaariyo sidii xabag badan ay u dhali lahaayeen. Iyadoo marka ay roobka ku irmaanaadan lagu sameeyo qaybahooda hoose dillaacin si ay xabagta ay u dhalaan.
Geedaha ugu wax soo saarka badan waxay qaarkood jiraan in ka badan boqol sano, qoysaska daggan dhulka buuralayda ah ee gobolka Bari ayay u yihiin hanti ma guurto ah oo ay dhaqaale ay ka helaan, Bile uma suurto galin bixinta kirada geedaha sanadkii hore sidoo kale waxaa lagu leeyahay $2,120 oo uu dayn ku qaadanayay tan iyo sanadkii hore.
Suuq-xumada ku dhacday ka ganacsiga Xijiga waxay saamaysay xataa ganacstadii ka iibsan jirtay dadka soo gura xabagta, Abshir Maxamed Maxamuud oo aabbe u ah qoys qof 6 ah wuxuu ka mid ahaa ragga ka dhoofiya Maydiga xeebta Qandala, ganacsato ajaaniib iyo soomaali iskugu jirta oo daggan dalka Sucuudiga ayuu xusay in ay sanadkiiba labo jeer ay ka iibsan jireen dadeecaddiisa, sanadkii hore wuxuu beec u helay oo kaliya 150 kiish halka markii hore in ka badan 600 oo kiish uu dhoofin jiray.
Wuxuu sheegay in ku dhawaad afar boqol oo kiish oo xabagtaas ah oo halkii xabbo $17 uu ka bixiyay ay ku xaraysan yihiin baqaaro ku yaalla Qandala, maaddama uusan beec u hayn, wuxuu billowgii sanadkan joojiyay iibsashada xabag kale.
“Hoos bay u dhacday sababtoo ah lama qaato bahalkan markii hore waa nalaga qaadan jiray hadda se wax naga qaataa ma jiraan, ganacsigii sidaas buu isku taagay maaddama uu wareegi waayay, waan iska sugaynaa xiligii aan wax ku helnaa insha allaahu rajaynaa in ay wax isbaddelaan.”
Siciid Cali Daahir oo daggan duleedka Qandala wuxuu wali ku foogan yahay iibinta xabagta nuuca Beenyada oo bishii koobaad ee sanadkan u soo go’day, wuxuu leeyahay geed 70 jir ah oo uu aabbihiis ka dhaxlay, Siciid oo aan hadda haysan suuq dibadda ah waxa uu iibiyaa kiilooyin Foox ah oo uu geeyo Qandala iyo dagmooyin kale oo ka tirsna gobolka Bari.
“Markii uu dhaqaaluhu hoos u dhacay meeshii $5 ama $6 kiiladii ahayd hadda waxay tagay $2, faa’iido sanadkan ugama xisaabtami karo, dayn hore oo sanadkii hore aan qabay oo dibaaji ah ayaa jirta mid lagu maareeyo qoyska iyo nolosha dadka ayaa jirta sida adeegga dharka iyo gabaha dayn baa lagu qaada.”
Wuxuu sheegay in toddobaadkii saddex ilaa afar kiilo oo Beenyo ah laga iibsado, taasi oo ku qasbaysa in uu raashin amaahdo maaddama aysan ku filnayn, $150 oo dayn ah ayaa lagu leeyahay oo uu qaadanaya bilihii la soo dhaafay, Siciid wuxuu aaminsan yahay in soo labakaclaynta Karoonaha ee sanadkan ay galaafatay suuqoodii dibadda.
“Dibadaha ayaa loo qaadijiray ama carabaha baa loo rarijiray haddii loo rarijiray xanuunkaan Covid-19 sida uu u yimid waddanka dhaqaalihiisa hoos buu u dhacay ganacsatadii qaadan jirtana way joojisay farahana ka laabatay.”
