(ERGO) – Xaliimo Shiikh Beddel, 50 jir, iyo qoyskeedu oo ka kooban shan carruur ah iyo seygeeda oo aragga naafo ka ah ma awoodin in ay xerada bannaankeed tagaan si ay ugu biiraan dadkii la daad guraynayey.
“Dhibaato weyn ayaan ku suganahay xaalkaayaga, rashin nooma dhaqna, dhar nooma dhaqna, wax noo dhaqan maleh,” ayey tiri Xaliimo oo la hadashay idaacadda Ergo xilli ay ku sugneyd xerada barakacayaasha ee ku taala duleedka magaalada Boosaaso, Puntland.
“Meel dab lagu shido maleh, wixii sahay noo yiiley joodhaayadii daadkay raaceen, meel roob ku da’ay dad daal qaatay waad garan, meel aan hadda ku jirno maleh buushkii waa dumay, bahalkii oo dhinac dhinac u jiifa ayaan ku jirnaa, wana guuri kari waayey odayga ayaan marin waayey biyaha biyo tan leh ayey ahaayeen wax ii mariyana waa waayey”.
Qoyska Xaliimo waxay toban sanno ka hor abaaro uga soo barakeceen degaanka Soomalida Itoobiya, markaas oo ay ka dhammaadeen xoolohoodii, haatanna waxay ka mid tahay dadka ay dhibaatada ka soo gaartay duufaanta Gati ee gobolka Bari ku dhufatay.
Qoysaska xero Tawakal laga daad gureeyey waxay dowladda hoose dejisay laba goobood oo kamid ah guryihii dowladdii hore ee loo yaqaanno Xero Inji, Inkastoo ay cunto iyo hoy roobka ka celiya oo teendhooyin ah heleen, weli gurmad rasmi ah looma fidin, waxaana ay ku jiraan dhibaato aan dhaamin daadkii ay ka carareen, sida uu Raadiyaha Ergo u sheegey Guddoomiyaha Xero Tawakal Rinji Cumar Cilmi.
“Waa dad barakacayaal ahaa oo sii barakacay,” sidaa ayuu Cumar dhibanayaasha ku sifeeyay. “Gurmad ilaa hadda gaadhay ma jiro, dowladdii iyo dadkiina waan sugaynaa kolley haddana gacanta ayaa lagu hayaa, wixii wax qabad ahna umadda Soomaaliyeed ayaan ka sugaynaa.”
Ayaan Maxamed Yuusuf oo haysata saddex carruur ah ayaa kamid ah dadka ku sugan xero Inji Boosaaso, waxa ay Raadiyaha Ergo u sheegtay in ay jeclaan lahayn in buushkeedii ka burburay dib loogu dhiso laguna celiyo, si ay ugu laabato nolosheedii hore.
“Noloshaydii shalay aan haystay in lay soo celiyo baan codsnayaa oo hoygaygii burburay dib laygu dhiso oo dib lay celiyo. Halkaas waan shaqo tegi jiray odaygana waa shaqo tegi jiray, hadda ma shaqo tegi kartid, reero badan ayaa meel laysugu keneey oo xanuuno ayaan xataa ka baqaynaa oo carruurta ayaa isku neefsanaysa”
Dhankaas iyo degmada Iskushuban, oo ah halka ay 22kii November duufaantu ka saf bilowday, Maryan Caafi Xuseen oo deggen magaalada Hurdiya oo baddu ku soo caariday waxa ay Raadiyaha Ergo u sheegtay in gurigeeda oo afar qol ahaa, saddex kamid ah ay dumeen, iyadoo ka cabsi qabta in midka ay hadda iyada iyo lixdeeda caruur ku jiraan uu soo dumo.
“Markii hore roob biyo ah ayaa na bilaabay, sidii biyuhu noo wadaan ayaa dabayl kudaysa nagu timi, dabayshaas ayaa dadka saamaysay, guryahana dumisay, xoolahana baabi’isay” ayey tidhi Maryan. Badanaa dadkii deganaa degaanka Hurdiya wey ka qaxeen.
Dabaysha ayaa sidoo kale saamaysay miyiga, iyada oo xoolaha oo goor galab ah mayracanaya ay laysay, aqalladiinii qoysaskana waa dumisay sida uu Raadiyaha Ergo u sheegey Cabdullaahi Cali Axmed oo adhigiisa oo 70 neef ahaa ay u baxsadeen 25 neef oo keliya.
Cabdullaahi wuxuu sheegey in qoysas badan oo deegaankiisa ah ay dhibka la qabaan. Dabaysha oo saacado badan haysay deegaanka xataa waxa ay madhisay dhirtii oo ay jajabisay.
