(ERGO) – Sacido Saleebaan Saalax iyo ku dhawaad 3,000 oo qoys oo kale waxaa ay bilawgii bishan ka barakacay guryahooda kaddib markii biyo-xireenka jameeco oo ku yaalla degmada Balcad uu karkaarada jabsaday.
Tuukooyinka ay biyuhu harqiyeen waxaa ka mid Kulmisyaroow, Raqayloow-buurdheere, Maqdas, Jameeco, Busle, Farbaraki, Damalay, Faay-dhuxul, Kooreebe, Yaaqloow, Buulo-banaan, Buulo-Siciid, Buulo-sheikh, Buulo-xanlaay, Buulo-garweyn iyo Mukay-dheere.
Qoyska Saciido oo ka kooban 10 ruux ayaa sida ay sheegtay ku kala go’doonsan labo deegaanka. Iyada iyo 4 carruur ah oo yaryar meel 2kilometir u jirta tuulada Mukay-dheere ayey joogaan halka kuwa kale na ay joogaan deegaan kale.
“Habeen madoow ayey biyahii nasoo baraiciyeen 9 caruur iyo aabahii dhalay waxaa iga la jooga 4 caruur ah, meel ay aadeen ma aqaan 5tii kale odaygii carruurta dhalay,” ayey tiri Saciido oo walaac ka muujisay xaalladda ay qoyskeeda ku sugan yihiin. Saciido iyo qoyskeeda waxaa ay ku noolaayeen tuukada Mukaay-dheere.
Cali Barsanji oo ah guddoomiyaha Mukaay-dheere ayaa Raadiyow Ergo sheegay in 1780 oo qoys oo ku noolaa tuulada ay hadda barakaceen. Guddoomiyaha ayaa qudhiisa ka mid ah dadka ka barakacy tuulada.
“Wax ii heray ma lahan matoorii, makiinta cajiinka waa la soo bixiwaayay, baabuur sidoo kale waa la soo bixiwaayay, guryahii oo dudunsan dhamaan maacuuntii iyo wixii raashiin ahaa waa la la soo bixi waayay, meeshii ayey ku halaabeen,” ayuu yiri Cali oo sheegay in sidoo kale shan tuulo oo hoos yimaada Mukay-dheere ay biyuhu saameeyeen.
Qaasim Cali oo ah gudoomiyaha degmada Balcad ayaa u sheegay Raadiyow Ergo in Dadka degenaa tuulooyinka uu biyo xireenka ku fatahay ay wajahayaan dhibbaatooyin ay ka mid yihiin hoy iyo cunno la’aan.
“Baraacii ugu danbeeyay waxay nasoo gaareen maalintii isniinta oo u beegneeyd 2badii bisha Desenbar, waxay gaarayaan ilaa 3000 oo qoys laakiin guud ahaan kuwii hore iyo kuwii danbe markaan diiwaan galinay waxay isu noqdeen 10,000 oo qoys,” ayuu yiri Qaasim.
